Banc Data SAIL yn cael ei gydnabod gyda Gwobr Pen-blwydd y Frenhines fawreddog

Mae Gwyddor Data Poblogaeth ym Mhrifysgol Abertawe wedi ennill Gwobr Pen-blwydd y Frenhines i gydnabod ei banc data byd-enwog Cyswllt Diogel Gwybodaeth Ddienw (sef y ‘Secure Anonymised Information Linkage’ - neu SAIL), a ariennir gan Ymchwil Iechyd a Gofal Cymru.

Mae gweithwyr gofal iechyd proffesiynol a gwyddonwyr data yn cynnal ymchwil gadarn gan ddefnyddio data cynhwysfawr SAIL am ddata poblogaeth Cymru a'r DU i wella iechyd a lles y cyhoedd.  Mae SAIL yn dwyn ynghyd, yn cysylltu, ac yn dadansoddi data o sawl ffynhonnell i ddarparu mewnwelediadau lefel poblogaeth ar gyfer llywodraethau a llunwyr polisi.

Yn y 15 mlynedd ers sefydlu SAIL mae ei gyflawniadau'n cynnwys:

• Darparu ymchwil Covid-19 eang a gwybodaeth polisi sy'n cael ei gyrru gan ddata ar gyfer llywodraethau Cymru a'r DU;
• Perfformio fel y system cysylltu data a mynediad cenedlaethol ar gyfer yr holl ddata cyhoeddus yng Nghymru, gan guradu data diogel o bob sector a mwy na 500 o sefydliadau;
• Darparu gwasanaethau cysylltu data a bancio ar gyfer llawer o fentrau byd-eang, gan gynnwys data a rennir o dros 30 o wledydd i gefnogi mentrau Cynghrair Data Rhyngwladol Covid-19; 
• Gwella'r sylfaen dystiolaeth ar gyfer llunwyr polisi, sy'n eu helpu i ddeall y berthynas rhwng eu darpariaethau gwasanaeth i wella bywydau pobl.

Dywedodd Cyfarwyddwr Ymchwil Iechyd a Gofal Cymru, Yr Athro Kieran Walshe:

Ar ran Ymchwil Iechyd a Gofal Cymru, rwy'n falch iawn bod gwaith tîm SAIL wedi cael ei gydnabod drwy'r wobr bwysig hon.    Mae Banc Data SAIL wedi derbyn cyllid gan Lywodraeth Cymru drwy Ymchwil Iechyd a Gofal Cymru a'i sefydliadau rhagflaenol ers 2006, ac rydym yn falch o allu darparu cefnogaeth a phartneriaeth barhaus er budd ymchwilwyr ledled y DU."

Dywedodd Cyd-gyfarwyddwr Gwyddor Data Poblogaeth ym Mhrifysgol Abertawe a Banc Data SAIL Yr Athro Ronan Lyons:

Rwy'n falch iawn bod gwaith tîm gwych SAIL wedi cael ei gydnabod yn y wobr hon.  Mae SAIL yn wirioneddol yn ymdrech tîm gwyddoniaeth lle mae’r byd academaidd, y GIG, llawer o sefydliadau sector cyhoeddus ac aelodau’r cyhoedd yn cydweithio i astudio llawer o faterion sydd o bwys i boblogaethau Cymru a’r byd."

Cyhoeddwyd gyntaf ym 1994, mae Gwobrau Pen-blwydd y Frenhines yn cael eu dyfarnu bob dwy flynedd ac yn cydnabod gwaith rhagorol gan golegau a phrifysgolion y DU, sy'n dangos rhagoriaeth ac arloesedd ac yn sicrhau budd gwirioneddol i'r byd ehangach.