200 o famau tro cyntaf yn cefnogi treial ymchwil bwydo babanod

Mae bron i 200 o famau tro cyntaf wedi gwirfoddoli ar gyfer astudiaeth ymchwil i weld a yw cymorth ychwanegol yn eu helpu i fwydo eu babanod mewn ffordd sy'n gweithio iddyn nhw.

Mae ABA-feed, astudiaeth ledled y DU, yn cael ei arwain gan dîm o fydwragedd arbenigol ym Mwrdd Iechyd Prifysgol Bae Abertawe, mewn cydweithrediad ag Ymchwil Iechyd a Gofal Cymru.

Mae'r astudiaeth ar agor i famau tro cyntaf, ni waeth sut maen nhw'n bwriadu bwydo’u baban ac mae'n ystyried a yw cael gwell cefnogaeth, megis cymorth cymheiriaid, yn gwella parhad bwydo ar y fron yn llwyddiannus.

Dywedodd y fydwraig ymchwil, Sharon Jones:  "Fe wnaethom ymuno fel bwrdd iechyd oherwydd ein bod yn cydnabod ei bod hi'n astudiaeth bwysig iawn. Rydym wir eisiau hyrwyddo bwydo ar y fron ac rydym yn awyddus i archwilio ffyrdd o ddarparu'r gefnogaeth fwyaf effeithiol i famau newydd.

"Rydym am gefnogi menywod i allu bwydo’u babanod o'r fron cyhyd ag y gallan nhw wneud ac eisiau gwneud hynny."

Er y gall bwydo ar y fron wella iechyd mamau a babanod, mae llai o fenywod yn y DU bwydo ar y fron na sydd mewn gwledydd eraill. Bydd llawer ohonynt yn rhoi'r gorau i fwydo ar y fron o fewn y pythefnos cyntaf.  Mae ymchwil gynharach wedi awgrymu y byddai'r rhan fwyaf o'r menywod hyn wedi hoffi mwy o gefnogaeth i'w helpu i barhau.

Dywedodd cydlynydd bwydo babanod Bae Abertawe, y fydwraig Heather O'Shea:  "Maen nhw'n teimlo'n awtomatig fel nad yw hyn ar eu cyfer nhw. Rydyn ni eisiau rhoi gwybod i bobl bod yna nifer o fuddion nad ydyn nhw efallai'n ymwybodol ohonynt."

Dywedodd Heather y gall bwydo ar y fron helpu i leihau'r risg o ganser y fron, canser yr ofari, clefyd esgyrn brau a chyflyrau cardiaidd yn hwyrach mewn bywyd. Ac i fabanod, gall leihau'r risg o ddiabetes, heintiau plentyndod, a'r risg o gael eu derbyn i'r ysbyty yn eu dwy flynedd gyntaf.

Cymerodd Jessica Bevan, o ardal Sgeti, Abertawe, a mam i'r baban Trixie, ran yn yr achos a dywedodd: "Fe wnes i wir fwynhau bod yn rhan o'r astudiaeth.  Roedd cael rhywun wrth law y gallwn i gysylltu â nhw pe bawn i'n ei chael hi'n anodd iawn, yn enwedig yn y dyddiau cynnar, yn wych iawn.

"Gyda chefnogaeth y bydwragedd yn yr ysbyty ac yna ein cefnogwr cymheiriaid, fe lwyddon ni.  Rwy'n falch iawn ein bod wedi gallu parhau."

Dywedodd Dr Nicola Williams, Cyfarwyddwr Cenedlaethol Cymorth a Chyflenwi Ymchwil Iechyd a Gofal Cymru:  "Hoffwn ddiolch i'r holl famau tro cyntaf sy'n cymryd rhan yn yr astudiaeth bwysig hon.  Mae'n galonogol gweld yr adborth cadarnhaol gan gyfranogwyr - mae eu profiadau yn hanfodol i lywio dyluniad gwasanaethau yn y dyfodol, ac i gefnogi menywod i wneud dewisiadau mwy gwybodus am yr hyn sy'n iawn iddyn nhw a'u baban."