Ymchwil ffibrosis systig yn grymuso Sophie i goncro her rhwyfo Môr yr Iwerydd

Mae claf ffibrosis systig dewr o Hwlffordd sydd wedi bod dan ofal tîm ymchwil arbenigol ers dros ddegawd yn herio'r ods trwy rwyfo ar draws Môr yr Iwerydd.

Mae Sophie Pierce, 31, yn benderfynol o fod y person cyntaf gyda ffibrosis systig i gwblhau'r her, ar ôl cymryd rhan mewn ymchwil feddygol arloesol yng Nghanolfan Ffibrosis Systig Oedolion Cymru Gyfan yn Ysbyty Athrofaol Llandochau, dan arweiniad Arweinydd Arbenigedd ar gyfer Cyflyrau Resbiradol Ymchwil Iechyd a Gofal Cymru, Dr Jamie Duckers.

Fel rhan o'r treial, cafodd Sophie fynediad at gyffur sydd wedi gwella ei swyddogaeth ysgyfaint yn sylweddol.  Ynghyd â dwy fenyw arall, bydd hi'n treulio tua 60 diwrnod yn rhwyfo 3,200 milltir o Lanzarote i Antigua i godi arian i'r Ymddiriedolaeth Ffibrosis Systig, Emily's Entourage a Paul Sartori Hospice at Home.

Dywedodd hi:  "Mae ffibrosis systig yn salwch caled iawn i fyw gydag ef, ond mae'r bobl rydw i wedi dod ar eu traws gyda'r cyflwr yn rhai o'r rhai mwyaf gwydn rydw i erioed wedi'u cwrdd.

"Mae faint o driniaethau sydd eu hangen arnaf wedi lleihau'n sylweddol, ac mae fy iechyd yn llawer mwy sefydlog nawr.  Erbyn hyn mae gen i wrthfiotigau yn yr ysbyty efallai unwaith y flwyddyn ar y mwyaf, ac mae fy iechyd yn llawer mwy rhagweladwy o ddydd i ddydd.

"Wrth wneud y rhwyfo, dwi eisiau dangos bod pobl sydd â ffibrosis systig yn gallu gwthio'u hunain - ac weithiau gwneud mwy nag y mae cymdeithas yn dweud wrthyn nhw y gallant wneud."

Mae ffibrosis systig yn achosi mwcws gludiog i gloi'r ysgyfaint a'r system dreulio, gan ei gwneud hi'n anodd anadlu a thorri bwyd i lawr. 

Cafodd Sophie ddiagnosis o ffibrosis systig yn dri mis oed.  Trwy gydol ei bywyd fel oedolyn, mae Sophie wedi dibynnu ar nebiwlyddion i glirio ei hysgyfaint ac mae'n cymryd 20 i 30 o feddyginiaethau bob dydd.

Fodd bynnag, yn 27 oed, gwellodd pethau'n ddramatig pan enillodd fynediad i dreial ar gyfer Kaftrio, cyffur a wellodd swyddogaeth ei hysgyfaint yn sylweddol.

Ychwanegodd Dr Duckers:  "Mae Sophie yn enghraifft anhygoel o sut nad yw cael clefyd prin fel ffibrosis systig yn eich atal rhag dod y cyntaf yn y byd mewn rhywbeth.

"Mae hi wedi cymryd rhan mewn amryw o astudiaethau ymchwil ffibrosis systig, gan gynnwys treialu cyffuriau, gofal ac offer newydd i helpu i wella bywyd y rhai sy'n byw gyda'r cyflwr heddiw ac yn y dyfodol.

Yn aml, ni fyddai plant a anwyd gyda ffibrosis systig yn y 1940au yn cyrraedd eu pen-blwydd cyntaf.  Nawr diolch i bŵer y gymuned ffibrosis systig, datblygiadau mewn gofal, data ac ymchwil achub bywyd fel ni, mae disgwyl i bobl a anwyd gyda'r cyflwr heddiw fyw bywyd llawn a chynllunio'u hymddeoliad.

Yng Nghanolfan Ffibrosis Systig Oedolion Cymru Gyfan yn Ysbyty Athrofaol Llandochau, rydym yn agor treialon therapi genetig ac wedi bod wrth wraidd treialon ymchwil arloesol o gyffuriau newydd a thechnolegau deallusrwydd artiffisial, a allai ragweld achosion o fflamychiadau anadlol cyn i gleifion a thimau clinigol ddod yn ymwybodol.

"Rydym wedi dod mor bell ond mae llawer mwy y gallwn ni ei wneud o hyd, ac rydym yn dibynnu ar bobl fel Sophie yn codi ymwybyddiaeth ac yn cymryd rhan mewn astudiaethau ymchwil i helpu gyda'n datblygiadau."

Cofrestrwch i'n cylchlythyr wythnosol a chadwch i fyny â'r newyddion ymchwil a'r cyfleoedd ariannu diweddaraf, a gwybodaeth ddefnyddiol arall.