Cydnabod Cartrefi sy’n Barod ar gyfer Ymchwil yn Senedd Cymru

Roedd ENRICH Cymru, rhwydwaith sy’n ymroddedig i gysylltu cartrefi gofal ac ymchwilwyr, yn falch o gyflwyno cyfres o wobrau i’r cartrefi gofal mwyaf gweithgar o ran ymchwil yn ei rwydwaith mewn digwyddiad dathlu a gynhaliwyd yn Senedd Cymru. 

Cyflwynwyd y wobr fawreddog ar gyfer y cartref gofal oedd fwyaf gweithgar o ran ymchwil yn 2024 i Blas Bryn Rhosyn, sy’n rhan o Grŵp Pobl. Mae’r wobr hon yn tynnu sylw at ymrwymiad eithriadol y cartref i fentrau ymchwil, gan gynnwys astudiaeth PREACH ac astudiaeth Agosatrwydd a Heneiddio’n Dda Open Societal Challenges (OSC), gan gyfrannu’n sylweddol at genhadaeth ENRICH Cymru o feithrin ymchwil o ansawdd uchel yn y gymuned cartrefi gofal. 

Dywedodd James Wadlow, Cyfarwyddwr Gofal Grŵp Pobl: “Mae hwn yn gyflawniad enfawr i Pobl, i Blas Bryn Rhosyn, ac i’r sector cartrefi gofal yn ei gyfanrwydd. Nid yn unig mae’n cydnabod ein hymroddiad i ymchwil, mae hefyd yn helpu i herio a newid y stereoteipiau sy’n aml yn gysylltiedig â chartrefi gofal. Rydym wedi ymrwymo i ddangos bod cartrefi gofal yn gallu bod yn lleoedd bywiog, arloesol lle mae ymchwil o ansawdd uchel yn ffynnu.” 

Ymhlith y rhai ddaeth yn ail roedd: 

• Cartref Gofal Haulfryn: Dywedodd Clare Roberts: “Mae ymchwil ym maes iechyd a gofal cymdeithasol yn hollbwysig. Rwy’n credu ynddi mor gryf am fod gan ein timau a’r bobl sy’n byw yn Haulfryn gymaint i’w gyfrannu. Gall eu profiadau, eu dealltwriaeth a’u lleisiau ysgogi newid ystyrlon, gan lywio gwelliannau a datblygiadau arloesol sy’n gwella gofal a chymorth.”
• Cartref Gofal Llys Cyncoed: Dywedodd Lis May: “Mae dod yn ail yn destament i’n hymroddiad diflino i ymchwil. Mae’n ein cymell i barhau i ymdrechu am ragoriaeth ac i wthio’r ffiniau o ran yr hyn y gallwn ni ei gyflawni ym maes gofal.”
• Gofal Dementia Preswyl Ysguborwen: Dywedodd Debbie Strong: “Mae’r gydnabyddiaeth heddiw yn cadarnhau’r hyn rydym wedi bod yn ei wneud ers blynyddoedd. Rydym wastad wedi bod yn gartref gofal blaengar, ac mae ymchwil wrth wraidd yr hyn rydym yn ei wneud i sicrhau ein bod yn darparu’r gofal gorau i’n preswylwyr.” 

Mae ENRICH Cymru yn dwyn ynghyd staff cartrefi gofal, preswylwyr ac ymchwilwyr i gyd-greu a hwyluso ymchwil effeithiol. Nod y rhwydwaith yw gwella ansawdd gofal drwy arferion sy’n seiliedig ar dystiolaeth a phrosiectau ymchwil arloesol. 

Dywedodd Dr Deborah Morgan, Rheolwr Ymchwil ENRICH Cymru: “Am ddathliad o’r gwaith ymchwil anhygoel sy’n cael ei wneud mewn cartrefi gofal ledled Cymru!  Mae’n ysbrydoledig gweld yr ymroddiad a’r brwdfrydedd dros ymchwil sy’n bodoli yn ein rhwydwaith. Llongyfarchiadau i Blas Bryn Rhosyn, a phawb ddaeth yn ail. 

“Rydym yn edrych ymlaen yn barod at y flwyddyn nesaf pan fyddwch yn croesawu mwy o gartrefi gofal sy’n barod ar gyfer ymchwil i’n rhwydwaith ac yn dathlu effaith ymchwil yn y gymuned cartrefi gofal ac ar ei chyfer.” 

Roedd y digwyddiad hefyd yn gyfle i ddathlu wyth mlynedd o ENRICH Cymru a myfyrio ar gyflawniadau’r rhwydwaith wrth hyrwyddo gofal sy’n seiliedig ar dystiolaeth; lansio adnoddau a hyfforddiant newydd i gartrefi gofal, a dechrau cyfnod cyllido newydd Ymchwil Iechyd a Gofal Cymru i barhau i gefnogi cartrefi gofal a rhoi cyfleoedd i breswylwyr gymryd rhan mewn ymchwil. 

I gael rhagor o wybodaeth am ENRICH Cymru neu i ymuno â’r rhwydwaith, ewch i wefan ENRICH Cymru.