Cynllun gweithredu strategol i hybu ymchwil gan nyrsys, bydwragedd a phroffesiynau perthynol i iechyd yng Nghymru

Mae cynllun ymchwil newydd ar gyfer nyrsys, bydwragedd a gweithwyr proffesiynol perthynol i iechyd wedi ei lansio heddiw.  

Wedi'i gomisiynu gan Lywodraeth Cymru, bwriad y cynllun yw cryfhau ymchwil ar draws y proffesiynau hyn a helpu i'w wneud yn nodwedd o ymarfer bob dydd. 

Mae'r cynllun gweithredu ymchwil strategol yn cefnogi'r syniad o "ymchwil i bawb" ac yn normaleiddio ymchwil ym mhob rôl, o fyfyrwyr i ymarferwyr ymgynghorol, i greu gallu ymchwil a hyder ar draws y proffesiynau. Bydd yn cryfhau seilwaith ac arweinyddiaeth sy'n galluogi ymgysylltiad a datblygiad ymchwil, trwy gefnogaeth gan arweinwyr addysg a gwasanaeth. Yn olaf, bydd yn gwerthfawrogi ac yn dathlu effaith ymchwil ar ymarfer, polisi a chleifion. 

Dywedodd Ysgrifennydd y Cabinet dros Iechyd a Gofal Cymdeithasol, Jeremy Miles:

Mae gwella gwasanaethau iechyd a gofal cymdeithasol yng Nghymru gan ddefnyddio dulliau sy'n seiliedig ar dystiolaeth yn hanfodol i wella ansawdd gofal. Mae ymchwil yn allweddol wrth gynhyrchu'r sylfaen dystiolaeth honno, i ysgogi gwelliannau mewn gwasanaethau iechyd a gofal cymdeithasol ac i osod y sylfeini ar gyfer canlyniadau gwell i gleifion, pobl a chymunedau. 

“Bydd ymchwil yn darparu cyfleoedd ar gyfer datblygu'r gweithlu a rolau swyddi gwell, sy'n helpu gyda recriwtio a chadw, yn ogystal â datblygu arweinwyr a meddylwyr beirniadol.  

“Rwy'n falch iawn bod y cynllun gweithredu ymchwil hwn, a gomisiynwyd gan Brif Swyddog Nyrsio Cymru a Phrif Gynghorydd Proffesiynau Perthynol i Iechyd, yn amlinellu camau gweithredu i wella ymarfer, creu capasiti a gallu, ac yn y pen draw bydd yn arwain at ganlyniadau gwell i bobl sydd angen gofal iechyd." 

Dywedodd Ruth Crowder, Prif Gynghorydd Proffesiynau Perthynol i Iechyd Llywodraeth Cymru: “Bob dydd, ym mhob lleoliad a sector, mae gweithwyr proffesiynol perthynol i iechyd, nyrsys a bydwragedd yn darparu gofal sy'n gwella bywydau. Ond maen nhw hefyd yn gofyn cwestiynau, yn chwilio am dystiolaeth, yn profi syniadau, yn arwain newid ac yn arloesi i ddiwallu anghenion unigolion a chymunedau.  

“Mae'r cynllun hwn yn cydnabod ac yn hyrwyddo'r cyfraniad hwnnw, gan nodi cyfeiriad clir i sicrhau bod ymchwil yn dod yn rhan greiddiol a gwerthfawr o bob rôl broffesiynol, o fyfyrwyr i uwch arweinwyr, mewn cyd-destunau clinigol, academaidd, iechyd cyhoeddus, gofal cymdeithasol a pholisi. 

“Mae'r cynllun hefyd yn grymuso pob aelod o staff iechyd a gofal i ddefnyddio, cymryd rhan, darparu ac arwain ymchwil fel rhan o'r gofal y maent yn ei ddarparu, ac i deimlo eu bod yn cael eu gwerthfawrogi wrth wneud hynny.” 

Dywedodd Sue Tranka, Prif Swyddog Nyrsio Cymru: “Cymru yw'r genedl gyntaf yn y DU i fod â chynllun fel hyn i hybu ymchwil ar draws y proffesiynau gofal iechyd allweddol hyn ac rydym yn falch bod ein gweithwyr proffesiynol talentog wedi dod at ei gilydd i arwain y ffordd yn hyn o beth.  

“Nid ar gyfer arweinwyr ymchwil yn unig mae’r cynllun hwn, mae ar gyfer pawb sy'n defnyddio, cynhyrchu neu sy'n cael eu hysbrydoli gan dystiolaeth i wella gofal.  

“Rydym yn estyn ein diolch diffuant i bawb a gyfrannodd at brosiect BLAENORIAETH. Mae eich gwybodaeth, eich profiad a'ch dyheadau wedi llunio'r cynllun hwn, a bydd eich arweinyddiaeth barhaus yn allweddol wrth ei gyflawni.” 

Datblygwyd y cynllun ymchwil strategol o'r prosiect BLAENORIAETH trwy ymgynghori â nyrsys, bydwragedd a phob un o'r 13 o broffesiynau perthynol i iechyd. Daeth y prosiect BLAENORIAETH ag ystod o leisiau ynghyd i nodi a mynd i'r afael â rhwystrau i fynediad, cofleidio a chymryd rhan mewn ymchwil, yn ogystal â datblygu llif o dalent i gefnogi'r genhedlaeth nesaf o arweinwyr ymchwil. 

Darllenwch fwy ar wefan Llywodraeth Cymru o wybodaeth ewch i.