Treial rheoledig ar hap sy'n asesu effeithiolrwydd cymhorthion clyw (gosod ymyriadau) o'i gymharu â chymhorthion clyw (gosod plasebo) wrth leihau canu yn y glust ar gyfer oedolion sydd ag ychydig o golled clyw

Crynodeb diwedd y prosiect

Mae colli clyw a chanu yn y glust yn gyflyrau cyffredin iawn yn y DU. Gall y ddau ohonynt gael effaith sylweddol ar ansawdd bywyd ac iechyd meddwl.  Ymarfer cyfredol gan weithwyr iechyd proffesiynol yn y GIG yw cynnig cymhorthion clyw i gleifion sydd â cholled clyw a chanu yn y glust, sy'n boenus iddynt. Fodd bynnag, nid oes unrhyw ganllawiau ar gyfer gweithwyr proffesiynol sy'n gweithio gyda chleifion sydd ag ychydig o golled clyw a chanu yn y glust. Mae'r wybodaeth hon yn bwysig i glinigwyr gynnig y gofal gorau i'r grŵp hwn o gleifion. O safbwynt y cyhoedd, bydd y wybodaeth hon yn eu galluogi i wneud y dewisiadau gofal sy'n seiliedig ar dystiolaeth orau drostynt eu hunain.       

Nod yr astudiaeth HEAR IT oedd darparu gwybodaeth ynghylch a yw cymhorthion clyw yn helpu pobl sydd ag ychydig o golled clyw a chanu yn y glust i reoli’r canu yn y glust yn fwy effeithiol.   

Cynlluniwyd yr astudiaeth fel hap-dreial rheoledig; roedd gan hanner y cyfranogwyr gymorth clyw gyda mwyhad sain ac roedd gan yr hanner arall gymorth clyw heb fwyhad sain. Nid oedd y cyfranogwyr yn gwybod pa gymorth clyw a gawsant. I'w cynnwys yn yr astudiaeth, roedd y cyfranogwyr wedi cael diagnosis o ganu yn y clust gydag ychydig o golled clyw mewn un glust neu'r ddwy, roeddent yn gallu darparu caniatâd gwybodus ysgrifenedig ac yn gallu cyfathrebu yn Saesneg. Y gobaith oedd y byddai'r astudiaeth yn recriwtio 128 o gyfranogwyr ar draws tri bwrdd iechyd yng Nghymru. Roedd disgwyl i gyfranogwyr wisgo'r cymhorthion clyw bob dydd am gyfnod o chwe mis. Cwblhawyd pedwar holiadur ganddynt ar ddechrau'r treial, mewn sesiwn ddilynol wedi wyth wythnos, ac eto ar ôl chwe mis. Yn ogystal, gofynnwyd i'r cyfranogwyr am eu defnydd o’r cymhorthion clyw.   

• Roedd gan bandemig COVID-19 oblygiadau sylweddol ar recriwtio cyfranogwyr i'r astudiaeth, ac yn anffodus dim ond 16 gafodd eu recriwtio dros gyfnod o 11 mis.  
• Trwy gydol y cyfnodau clo yn ystod y pandemig, adroddodd gwasanaethau awdioleg ledled Cymru fod llai o weithgarwch cleifion gyda llai o gleifion yn cael eu hatgyfeirio gan eu meddygon teulu a llai o gleifion eisiau mynd i apwyntiadau cleifion allanol o fewn lleoliadau'r ysbyty. 
• Dywedodd clinigwyr treial fod llawer o gleifion a oedd yn defnyddio'r gwasanaeth wedi nodi cynnydd mewn salwch meddwl o'i gymharu ag iechyd meddwl cyn COVID-19.  
• Roedd staffio hefyd yn broblem ar draws y tri safle; gyda rhai staff yn cael eu hadleoli i swyddi yn eu hysbyty neu’n cael eu heffeithio gan COVID-19 eu hunain.  
• Gan fod y cyllid wedi dod i ben cyn i'r treial ddod i ben, ni chafodd data dilynol chwe mis ei gasglu gan nifer o gyfranogwyr. 
• Dim ond ar gyfer dadansoddi disgrifiadol y gellir defnyddio canlyniadau'r treial