£6.4 miliwn i gefnogi ymchwil gofal cymdeithasol ac iechyd hanfodol yng Nghymru

Mae Ymchwil Iechyd a Gofal Cymru wedi cyhoeddi pwy sydd wedi ennill y gwobrau galwadau am gyllid diweddaraf, gyda buddsoddiadau allweddol yn cwmpasu ystod eang o bynciau ymchwil, o hyrwyddo llesiant meddyliol i iechyd menywod.

O ganlyniad i'r galwadau am gyllid, mae 26 o wobrau cyllid newydd wedi eu rhoi gyda gwerth oes cyfunol yn cyfateb i £6.4 miliwn.

Ariannu prosiectau ymchwil o ansawdd uchel

• Ymchwil er Budd Cleifion a’r Cyhoedd Cymru

• Cynllun Ariannu Ymchwil: Grant Gofal Cymdeithasol

Mae'r ddau gynllun yn cynnig lefelau amrywiol o gefnogaeth i ddiwallu anghenion prosiectau ymchwil amrywiol. Er enghraifft, mae'r Ymchwil er budd Cleifion a’r Cyhoedd Cymru'n cefnogi cynyddu capasiti a galluogrwydd yn y GIG yng Nghymru (gan gynnwys Iechyd Cyhoeddus Cymru) drwy ariannu ymchwil sy'n gysylltiedig ag arfer o ddydd i ddydd y gwasanaeth iechyd, tra bo'r Cynllun Ariannu Ymchwil: Grant Gofal Cymdeithasol yn cefnogi cynyddu capasiti a galluogrwydd ym maes ymchwil gofal cymdeithasol.

Meithrin talent ymchwil yng Nghymru

• Cymrodoriaethau Ymchwil Iechyd

• Ysgoloriaethau PhD Iechyd

Mae'r gwobrau personol hyn yn cyfrannu at ddatblygiad gyrfa. Nod Cynllun Cymrodoriaethau Ymchwil Iechyd yw cefnogi unigolion i ddod yn ymchwilwyr annibynnol, tra bod y Cynllun Ysgoloriaethau PhD Iechyd yn cynnig cyfle i unigolion talentog wneud gwaith ymchwil ac astudio gan arwain at PhD.

Yn ogystal â'r cynlluniau grant, mae Ymchwil Iechyd a Gofal Cymru hefyd wedi ariannu Gwobr Cymrodoriaeth Ymchwil Iechyd a Gofal Cymru / Sefydliad Cenedlaethol ar gyfer Ymchwil Gofal Cymdeithasol ac Iechyd. Dyfernir Dr Joanna Martin o Brifysgol Caerdydd am ei hastudiaeth i wella gwybodaeth, ymwybyddiaeth a diagnosis o anhwylder diffyg canolbwyntio a gorfywiogrwydd (ADHD) mewn menywod ifanc.

Dywedodd Michael Bowdery, Pennaeth Rhaglenni, Ymchwil Iechyd a Gofal Cymru:

Roeddem wrth ein bodd yn gweld cynifer o geisiadau o ansawdd uchel eleni, ar gyfer grantiau prosiect a gwobrau personol. Mae’r cynnydd diweddar o ran ariannu wedi ein galluogi i ariannu ychydig yn fwy o wobrau nag arfer mewn ystod o bynciau iechyd a chymdeithasol arwyddocaol sy’n cyd-fynd â blaenoriaethau Llywodraeth Cymru, gan gynnwys canser, diabetes, plant sy'n derbyn gofal, y rhai sy'n gadael gofal, iechyd meddwl, ymateb brys a chydraddoldeb, amrywiaeth a chynhwysiant. Ar y cyd mae'r prosiectau hyn yn enghraifft arall o botensial ymchwil i wneud gwahaniaeth gwirioneddol i iechyd a llesiant pobl. "

Ceir rhestr lawn o'r gwobrau ariannu a'r enillwyr isod:

Cymrodoriaethau Ymchwil Iechyd

Rhoi'r gefnogaeth sydd ei hangen ar unigolion talentog i ddod yn ymchwilwyr annibynnol wrth ymgymryd â phrosiectau ymchwil o ansawdd uchel sydd o fudd i ofal cymdeithasol yng Nghymru.

• Dr Emma Rees, Prifysgol Abertawe

Mewn pobl hŷn pan amheuir methiant y galon, a yw ychwanegu sgan uwchsain sydd â chanolbwynt i'r llwybr cymunedol presennol yn gwella ansawdd gofal iechyd? (HF-FOCUS).

• Mrs Hayley Reed, Prifysgol Caerdydd

Nodi ac Addasu Ymyrraeth Iechyd Meddwl a Llesiant Effeithiol ar gyfer ei Gweithredu gyda Myfyrwyr Ysgolion Uwchradd Cymru rhwng 11 ac 18 oed.

• Dr Bruce MacLachlan, Prifysgol Caerdydd

Datgodio y rheolau moleciwlaidd sy'n llywodraethu ymatebion celloedd CD4 + T i beptidau antigen cysylltiedig â thiwmor i wella imiwnedd gwrth-diwmor".

• Dr Naledi Formosa, Prifysgol Caerdydd

Datblygu llwyfan ysgyfaint-ar-sglodyn newydd i ymchwilio i fetastasis canser y fron.

Ymchwil er Budd Cleifion a’r Cyhoedd (RfPPB) Cymru

Ariannu ymchwil sy’n ymwneud ag arfer y gwasanaeth iechyd o ddydd i ddydd, gyda budd i gleifion a'r cyhoedd wedi'i ddiffinio'n glir.

• Dr Magdalena Meissner, Bwrdd Iechyd Prifysgol Aneurin Bevan

Integreiddio Biopsi Hylifol i Lwybr Diagnostig Canser yr Ysgyfaint.

• Dr Rose Stewart, Bwrdd Iechyd Prifysgol Betsi Cadwaladr

Rhaglen addysg gydweithredol yn y gymuned i leihau Anghydraddoldebau o ran y nifer sy’n manteisio ar sgrinio ar gyfer diabetes ymhlith pobl o Leiafrifoedd Ethnig yng Nghymru: Astudiaeth ddichonoldeb Cam I (CYMELL).

• Dr Nigel Rees, Ymddiriedolaeth GIG Gwasanaeth Ambiwlans Cymru

999 R.E.S.P.O.N.D. (penderfyniadau anfon brys adeg COVID-19).

• Miss Eirini Skiadaresi, Bwrdd Iechyd Prifysgol Hywel Dda

Dichonoldeb llwybr amgen ar gyfer atgyfeiriadau ysbyty gan Sgrinio Llygaid Diabetig Cymru (DESW) ar gyfer pobl yr amheuir eu bod â chlefyd y llygaid diabetig sy'n bygwth golwg (macwlopathi diabetig).

• Dr Ceri Lynch, Bwrdd Iechyd Prifysgol Cwm Taf

Sut y gellir defnyddio realiti rhithwir ymgolli i hwyluso adferiad ac adsefydlu cleifion yn dilyn arhosiad mewn gofal dwys?

Cynllun Ariannu Ymchwil: Grantiau Gofal Cymdeithasol

Cefnogi prosiectau ymchwil o'r radd flaenaf sydd â pherthnasedd clir i'r angen am iechyd a llesiant a/neu drefnu a darparu gofal iechyd yng Nghymru.

• Yr Athro Sin Yi Cheung, Prifysgol Caerdydd

Anghydraddoldebau ethnig a chrefyddol yng ngwasanaethau cymdeithasol plant yng Nghymru: Patrymau a chanlyniadau.

• Yr Athro Donald Forrester, Prifysgol Caerdydd

Deall llesiant goddrychol plant iau sy'n derbyn gofal yng Nghymru: Astudiaeth Ansoddol wedi'i Chynllunio gyda Phlant mewn Gofal gan Ddefnyddio Methodolegau Creadigol.

• Dr Clive Diaz, Prifysgol Caerdydd

Eiriolaeth Rhieni yng Nghymru: Gwerthusiad dulliau cymysg o'i effeithiolrwydd wrth gefnogi rhieni.

• Dr Emily Lowthian, Prifysgol Abertawe

Llwybrau addysgol a chanlyniadau i blant sy'n derbyn gofal: astudiaeth cysylltu data ar raddfa’r boblogaeth.

• Dr Nina Maxwell, Prifysgol Caerdydd

Beth yw canlyniadau'r gwasanaeth ar gyfer plant sy’n dioddef camfanteisio troseddol? Astudiaeth achos o deithiau gwasanaeth plant y camfanteisiwyd yn droseddol arnynt mewn dau awdurdod lleol yng Nghymru.

• Dr Ceryl Davies, Prifysgol Bangor

Archwilio'r rhwystrau a'r galluogwyr o ran ymgysylltu'n effeithiol â'r rhai sy'n gadael gofal.

• Dr Jennifer Acton, Prifysgol Caerdydd

Dull ataliol ar gyfer Mynediad at lwybr System gyfan Gynaliadwy, ar gyfer pobl hŷn gyda nam ar y golwg (ASSIST).

• Dr Gillian Hewitt a'r Sarah Macdonald, Prifysgol Caerdydd

Darpariaeth iechyd meddwl i blant a phobl ifanc mewn ysgolion a cholegau addysg bellach (11-25 oed) gyda phrofiadau o ofal: Astudiaeth dull cymysg o weithredu, derbynioldeb, angen a chanlyniadau blaenoriaeth.

Ysgoloriaethau PhD Iechyd

Gan gefnogi cynyddu capasiti mewn ymchwil gofal cymdeithasol drwy ariannu prosiectau ymchwil o ansawdd uchel, mae'r ysgoloriaeth yn cynnig cyfle i unigolion wneud gwaith ymchwil ac astudio a fydd yn arwain at PhD.

• Yr Athro Marianne van den Bree, Prifysgol Caerdydd

Ymchwilio i benderfynyddion cydafiechedd iechyd corfforol a meddyliol drwy gydol oes.

• Yr Athro Alex Tonks, Prifysgol Caerdydd

Deall mecanweithiau Ffactor Niwclear I-C (NFIC) wrth reoleiddio datblygiad a chynnydd lewcemia myeloid acíwt (AML).

• Dr Lisa Hurt, Prifysgol Caerdydd

Awtistiaeth a chyflogaeth: Dysgu o brofiadau yn ystod pandemig COVID-19 i wella cymorth yn y gweithle. Astudiaeth dulliau cymysg.

• Dr Andrew E Fry, Prifysgol Caerdydd

Defnyddio cysylltu data i ymchwilio i effaith statws cludwyr ar gyfer anhwylderau genetig cyffredin ar iechyd.

• Yr Athro Richard Stanton a'r Athro Eddie Wang, Prifysgol Caerdydd

Optimeiddio imiwnotherapi gwrthfeirysol newydd.

• Yr Athro Jennifer Davies a'r Athro Chris Bundy, Prifysgol Caerdydd

Ymchwilio i ryngweithio rhwng newidynnau ffisiolegol, gwybyddol, ac ymddygiadol mewn pobl sy'n profi COVID hir.

• Yr Athro Jacky Boivin, Prifysgol Caerdydd

Gwerthusiad Realydd o weithredu gwefan ac offer endometriosis y GIG sy'n canolbwyntio ar fenywod i gefnogi diagnosis mwy amserol a rhannu penderfyniadau gydag ymarferwyr cyffredinol.

• Dr You Zhou, Prifysgol Caerdydd

Targedu Sefydlogi Antigen i Drin Clefyd yr Afu Brasterog.

Gwobr Cymrodoriaeth Sefydliad Cenedlaethol dros Ymchwil Iechyd a Gofal/Ymchwil Iechyd a Gofal Cymru

Cefnogi unigolion ar eu taith i fod yn arweinwyr y dyfodol mewn ymchwil. Mae Ymchwil Iechyd a Gofal Cymru yn gofalu am gyllido a rheoli ceisiadau llwyddiannus i Raglen Gymrodoriaeth y Sefydliad Cenedlaethol dros Ymchwil Iechyd a Gofal (NIHR).

•  Dr Joanna Martin, Prifysgol Caerdydd

Gwella gwybodaeth, ymwybyddiaeth, a diagnosis o anhwylder diffyg canolbwyntio a gorfywiogrwydd (ADHD) mewn menywod ifanc.