Partneriaeth Bwrdd Iechyd Prifysgol Hywel Dda yn ennill gwobr MediWales am ap ffôn clyfar i gleifion

Mae Sefydliad TriTech Bwrdd Iechyd Prifysgol Hywel Dda a Bond Digital Health (BDH) wedi ennill Gwobr Partneriaeth Ymchwil Iechyd a Gofal Cymdeithasol gyda Diwydiant yng Ngwobrau Arloesedd MediWales eleni. Noddir y wobr hon gan Ymchwil Iechyd a Gofal Cymru.

Gweithiodd tîm Sefydliad TriTech gyda pheirianwyr meddalwedd yn BDH i ddatblygu ap ffôn clyfar, sy'n caniatáu i gleifion gymryd rheolaeth o'u clefyd rhwystrol cronig yr ysgyfaint (COPD). Mae COPD yn grŵp cyffredin o gyflyrau'r ysgyfaint sy'n achosi anawsterau anadlu hirdymor.

Wedi'i gynhyrchu ar y cyd â chleifion, mae ap COPD Pal yn caniatáu i bobl reoli eu cyflwr drwy logio eu symptomau, eu teimladau a'u meddyginiaethau.

Derbyniodd yr Athro Keir Lewis, Arweinydd Anadlol Clinigol ym Mwrdd Iechyd Prifysgol Hywel Dda, y wobr.

Dywedodd Keir: "Mae'n anrhydedd derbyn y wobr hon ar ran y bartneriaeth. Drwy ap COPD Pal roeddem eisiau rhoi mwy o reolaeth i gleifion dros eu cyflwr ac rydym yn falch bod 89% ohonynt wedi dweud y byddent yn defnyddio'r ap yn rheolaidd. 

"Ers defnyddio'r ap, mae cleifion yn dweud bod eu dealltwriaeth o'u clefyd rhwystrol cronig yr ysgyfaint a'u hyder wedi cynyddu. Ochr yn ochr â hyn, rydym wedi gweld y grŵp hwn yn cysylltu â'u meddyg teulu yn llai ac roeddent yn llai tebygol o fod yn yr ysbyty. Rydym bellach yn gweithio'n agos gyda Bond Digital Health i fireinio'r ap ymhellach er mwyn sicrhau ei effaith fwyaf posibl ar les cleifion."

Dywedodd Carys Thomas, Pennaeth Polisi Ymchwil Iechyd a Gofal Cymru: "Rydym yn falch o fod wedi noddi'r wobr ragorol hon, sy'n dathlu partneriaeth diwydiant sy'n canolbwyntio ar ymchwil iechyd a gofal cymdeithasol. 

"Mae'r Sefydliad TriTech a thîm Iechyd Digidol Bond yn gwneud gwaith arloesol gyda'u ap ffôn clyfar, sydd wedi gwella bywydau pobl sydd â chlefyd rhwystrol cronig yr ysgyfaint. Rydym yn eu llongyfarch am ennill y wobr hon ac yn gobeithio y bydd eu dull gweithredu yn ysbrydoli eraill."

I gael rhagor o wybodaeth am enillwyr eraill y gwobrau, ewch i wefan MediWales.