Beth yw effaith cyfyngiadau addysgol a chyfyngiadau eraill yn ystod y pandemig COVID-19 ar blant 3-13 oed
Pa effeithiau mae cyfyngiadau yn ystod y pandemig wedi’u cael ar blant 3 i 13 oed?
Mae’r pandemig COVID-19 wedi amharu ar fywydau plant ledled y byd. Nod yr adolygiad hwn oedd edrych ar sut y mae cyfyngiadau wedi effeithio ar lesiant corfforol a meddyliol plant a’u haddysg. Bu’r adolygiad yn edrych ar effaith cyfyngiadau ehangach, o ran addysg, a hefyd yn edrych i weld a oedd hyn wedi effeithio ar rai grwpiau o blant yn fwy nag ar eraill.
Darganfyddiadau
Cafodd amhariadau a chyfyngiadau mewn addysg effaith negyddol ar ddysgu, llesiant ac iechyd meddwl, bwyta ac iechyd corfforol. Roedd plant hefyd mewn risg fwy o bobl yn eu cam-drin ac yn camfanteisio arnyn nhw.
Plant sy’n byw mewn tlodi sydd wedi gweld yr effaith fwyaf, yn enwedig oherwydd diffyg prydau bwyd rheolaidd, amodau sy’n achosi straen a gorbryder yn y cartref, cyfleoedd cyfyngedig i gael gafael mewn adnoddau digidol ar gyfer dysgu, neu fynediad cyfyngedig i fannau awyr agored ar gyfer gweithgarwch corfforol.
O ran llesiant ac iechyd meddwl, effeithiwyd yn arbennig ar blant a oedd eisoes mewn risg o iechyd meddwl gwael neu a oedd yn dioddef o orbryder sylweddol cyn y pandemig, a’r rheini â gofalwyr a oedd yn dioddef o drallod seicolegol.
Effeithiwyd yn fwyaf ar blant iau a’r rheini o gymunedau dan anfantais o ran dysgu a lefelau cyflawni.
Roedd llai o weithgarwch yn effeithio’n arbennig ar blant ag anableddau.
Mae’r dystiolaeth a ddarganfuwyd yn wan, heb ddata diweddar a thymor hir.
Goblygiadau
Er bod yna rywfaint o dystiolaeth o niwed, mae’n bosibl ei bod yn rhy fuan i asesu’r effeithiau tymor hir yn fanwl gywir.
Nid oes brin unrhyw dystiolaeth o fesurau a gymerwyd i gyfyngu ar y niweidiau hyn, er bod ysgolion unigol o bosibl wedi cymryd camau i gefnogi plant. Mae angen ymchwil sylfaenol yn y maes hwn.
Datgelodd ein darganfyddiadau’r angen i:
- Sicrhau cyfathrebu da rhwng yr ysgol a’r cartref
- Cefnogi cynnwys rhieni mewn gweithgareddau dysgu eu plant
- Datblygu dulliau dysgu annibynnol
- Sicrhau bod cyfrifiaduron a’r rhyngrwyd ar gael yn well i gefnogi dysgu gartref
- Rhoi mwy o flaenoriaeth i lesiant ac iechyd meddwl o fewn yr ysgol/ y gymuned, a monitro hyn
- Darparu mwy o gefnogaeth ar gyfer dysgu yn yr awyr agored
- Sicrhau bod yna gefnogaeth ar gael i’r dysgwyr mwyaf difreintiedig ac agored i niwed
- Cefnogi dysgwyr Cymraeg ar aelwydydd di-Gymraeg
- Cynnwys y materion hyn mewn hyfforddiant proffesiynol ar gyfer athrawon
RR00013