Ymchwil Iechyd a Gofal Cymru yn cyhoeddi Fframwaith newydd i wreiddio ac integreiddio ymchwil yn y GIG

Heddiw, mae Ymchwil Iechyd a Gofal Cymru wedi cyhoeddi Fframwaith Ymchwil a Datblygu (Y&D) newydd, mewn ymgyrch i wreiddio ac integreiddio ymchwil i bob agwedd ar wasanaethau iechyd a gofal yn GIG Cymru. Mae’r Fframwaith yn amlinellu sut beth yw ‘rhagoriaeth ymchwil’ o fewn sefydliadau’r GIG yng Nghymru, lle mae ymchwil yn cael ei gofleidio, ei integreiddio i wasanaethau, ac lle mae’n rhan greiddiol o ddiwylliant y sefydliad.

Mae gwella gwasanaethau iechyd a gofal yng Nghymru drwy ddefnyddio dulliau sy’n seiliedig ar dystiolaeth yn hanfodol i wella ansawdd gofal a rhoi’r cyhoedd wrth galon popeth. Mae’n hysbys yn gyffredinol bod ymchwil yn gwneud gwahaniaeth gwirioneddol i wella canlyniadau iechyd ac i fywydau cleifion a phobl yn ein cymunedau.

Mae ymchwil yn rhoi’r cyfle i gleifion a defnyddwyr gwasanaeth gael mynediad at driniaethau a gwasanaethau newydd, a fydd yn gwella eu hiechyd a’u llesiant ac yn cyfrannu at leihau anghydraddoldebau iechyd yn y boblogaeth yn gyffredinol. Mae ymchwil ac arloesi ym maes iechyd a gofal yn hollbwysig i ddarparu a datblygu gwasanaethau a sefydliadau’r GIG yng Nghymru, sydd â rôl hollbwysig i’w chwarae i gefnogi ymchwil.

Gwyddom fod ymchwil y GIG wedi chwarae rhan hanfodol yn ystod y pandemig, lle cafodd ei ymgorffori a’i integreiddio’n wirioneddol i wasanaethau gofal iechyd i ddatblygu a phrofi triniaethau ar gyfer COVID-19. Bydd y Fframwaith hwn yn sbardun allweddol i gadw ymchwil yn uchel ar yr agenda o fewn y GIG, ac atgyfnerthu’r rôl y mae’n ei chwarae mewn gofal dydd i ddydd.

Mae’n cael ei gyhoeddi fel canllaw cenedlaethol cyson i sefydliadau’r GIG, lle disgwylir i’w nodweddion allweddol fod yn rhan greiddiol o ddiwylliant sefydliadol. Mae Llywodraeth Cymru hefyd yn cyhoeddi’r Fframwaith drwy Gylchlythyr Iechyd Cymru i ddangos ei bwysigrwydd.

Dywedodd Dr. Leighton Phillips, Cadeirydd gweithgor Fframwaith Ymchwil a Datblygu'r GIG a Chyfarwyddwr Ymchwil, Arloesi, a Phartneriaethau Prifysgol ym Mwrdd Iechyd Prifysgol Hywel Dda:

Mae'n wych gweld y Fframwaith allweddol hwn yn dwyn ffrwyth a hoffwn ddiolch i bawb sydd wedi bod yn rhan o'i gyd-ddylunio a chynhyrchu am eu hymdrechion. 

“Mae’r GIG yn wynebu heriau sylweddol o ran y ffordd y mae’n gweithio a’r ffordd y gallwn barhau i ddarparu gwasanaethau allweddol i gleifion. Yn y cyd-destun hwn, ni fu ymchwil erioed mor bwysig o ran y ffordd yr ydym yn ymdrin ag iechyd y boblogaeth a’r ffordd yr ydym yn cynllunio ein gwasanaethau, gan ddefnyddio synthesis tystiolaeth i nodi bylchau mewn gwybodaeth, sefydlu sylfaen dystiolaeth ar gyfer canllawiau arfer gorau, a helpu i hysbysu llunwyr polisi ac ymarferwyr.

“Drwy’r Fframwaith hwn, gall byrddau iechyd ledled Cymru sicrhau bod ymchwil wedi’i wreiddio yn eu sefydliad, gan ei roi wrth galon gofal cleifion da ac yn y pen draw arwain at ganlyniadau gwell.”

Dywedodd yr Athro Kieran Walshe, Cyfarwyddwr Ymchwil Iechyd a Gofal Cymru: “Yn fyr, mae ymchwil yn bwysig. Mae'n achub bywydau, trwy ysgogi gwelliannau mewn gofal cleifion.

Dros yr ychydig flynyddoedd diwethaf, mae’r rôl hollbwysig y mae gweithwyr ymchwil ac ymchwil proffesiynol wedi’i chwarae i gadw pobl yn iach wedi dod yn fwyfwy amlwg, ac yn dilyn cyfnod helaeth o waith â ffocws a chraff ar y cyd â rhanddeiliaid ar draws GIG Cymru, rwyf wrth fy modd cael cyhoeddi lansiad Fframwaith Ymchwil a Datblygu’r GIG.”