"Rydym eisiau cyflawni ein hymchwil effeithiol ein hunain yn y dyfodol" – Datgelu enillydd Cyfraniad Eithriadol at Gyflenwi Ymchwil

Mae John Rice, Ffisiotherapydd Clinigol Arbenigol ac Arweinydd Ymchwil Ffisiotherapi ym Mwrdd Iechyd Prifysgol Cwm Taf Morgannwg, wedi ennill y Wobr am Gyfraniad Eithriadol at Gyflenwi Ymchwil yng Ngwobrau Hyrwyddo Gofal Iechyd Cymru. Cyflwynodd Carys Thomas, Pennaeth Polisi Ymchwil Iechyd a Gofal Cymru ei dlws i John mewn seremoni ginio yng Nghaerdydd.

Mae Gwobrau Hyrwyddo Gofal Iechyd Cymru yn cydnabod ac yn dathlu gwaith pwysig ac arloesol gwyddonwyr gofal iechyd a gweithwyr iechyd proffesiynol perthynol ledled Cymru.

Mae John wedi ymgymryd â swydd Ffisiotherapydd Ymchwil newydd ym Mwrdd Iechyd Prifysgol Cwm Taf Morgannwg, gan ymgorffori diwylliant ymchwil arloesol, cadarnhaol ymhlith y gweithlu ac arwain portffolio ymchwil ffisiotherapi’r Bwrdd Iechyd.

Dywedodd John: "Rydym eisiau ymgorffori ymchwil yn ein harferion, i fod yn ddefnyddwyr ymchwil arbenigol i’n helpu i gyflenwi gofal gwell i’n cleifion, i gefnogi’r gwaith o gyflawni portffolios ac i gyflawni ein hymchwil effeithiol ein hunain yn y dyfodol.

"Rydym yn creu diwylliant lle mae gan yr holl staff ffisio gyfle i gymryd rhan mewn cyflenwi ymchwil, ac mae hyfforddiant a chefnogaeth ar gael.

"Rydym yn meithrin cysylltiadau a pherthnasoedd gweithio effeithiol yn y tîm amlddisgyblaethol, ag ymddiriedolaethau eraill, y byd academaidd, diwydiant a sefydliadau ymchwil y sector cyhoeddus."

Mae John wedi cyflwyno pum astudiaeth portffolio ymchwil, wedi hwyluso 10 aelod o staff i gymryd rhan weithredol mewn ymchwil glinigol ac wedi cefnogi ei gydweithwyr drwy hyfforddiant Ymarfer Clinigol Da.

Mae John wedi ymgysylltu’n eang â rhwydweithiau gweithwyr iechyd proffesiynol perthynol ac â chydweithwyr o dimau amlddisgyblaethol yn y bwrdd iechyd a ledled Cymru. Mae wedi cydweithredu’n agos â chydweithwyr nyrsio yn y tîm Ymchwil a Datblygu a thu hwnt â ffisiotherapyddion ymchwil yn Birmingham, Llundain a Keele.

"Bydd ennill y wobr yn ein helpu i godi proffil ymchwil Bwrdd Iechyd Prifysgol Cwm Taf Morgannwg a chyrraedd ein nod o ddatblygu a gwella ein diwylliant ymchwil."

Roedd Dr Nicola Williams, Cyfarwyddwr Cefnogi a Chyflenwi yn Ymchwil Iechyd a Gofal Cymru, yn aelod o’r panel beirniadu ar gyfer y wobr hon. Dywedodd:

“Mae’r Wobr am Gyfraniad Eithriadol at Gyflenwi Ymchwil yn cydnabod unigolion sy’n defnyddio cydweithio eithriadol i gyflenwi ymchwil sy’n gwella bywydau pobl yng Nghymru.

"Mae John wedi gwneud hynny gydag angerdd, brwdfrydedd a gwnaeth y ffordd y mae’n defnyddio dull system gyfan argraff fawr arnom – gan gynyddu ymwybyddiaeth o ymchwil ac ymarfer yn seiliedig ar dystiolaeth a chefnogi pobl i arwain astudiaethau ymchwil. Mae wedi arwain drwy esiampl yn ei ymrwymiad i gyflawni newid. Mae ei waith yn effeithio’n uniongyrchol ar ofal cleifion, gydag ymchwil a fydd yn dylanwadu ar newidiadau i lwybrau cleifion."

Cafodd enillwyr Gwobrau Hyrwyddo Gofal Iechyd Cymru eu cyhoeddi mewn seremoni ar 18 Tachwedd. Cafodd y Wobr am Gyfraniad Eithriadol at Gyflenwi Ymchwil ei noddi gan Ymchwil Iechyd a Gofal Cymru.

Dysgwch fwy am enillwyr eraill Gwobrau Gofal Iechyd Cymru 2022.