Mae treial brechlyn COVID-19 a astudiwyd yn Wrecsam yn dangos canlyniadau interim addawol

Mae treial byd-eang arall o frechlyn COVID-19, a oedd yn cynnwys cyfranogwyr o ogledd Cymru, wedi cyhoeddi canlyniadau interim addawol iawn yn dangos effeithiolrwydd mwy nag 89% yn erbyn y feirws.

Yr ail o dri brechlyn COVID-19 a dreialwyd yng Nghymru, cyflwynwyd yr astudiaeth hon trwy gydweithrediad rhwng Iechyd Cyhoeddus Cymru, Ymchwil Iechyd a Gofal Cymru a Bwrdd Iechyd Prifysgol Betsi Cadwaladr. Cyrhaeddodd targed y DU dros 15,000 o wirfoddolwyr, gyda bron i 500 o bobl yn cael eu recriwtio o radiws 30 milltir o Wrecsam.

Canlyniadau rhagarweiniol yw'r rhain, a bydd tîm yr astudiaeth yn parhau i gasglu mwy o ddata cyn eu cyflwyno i reoleiddwyr i'w hadolygu'n derfynol yn ystod yr wythnosau nesaf.

Dywedodd Dr Orod Osanlou, Prif Ymchwilydd Iechyd Cyhoeddus Cymru ar gyfer y treial Novavax ac Ymgynghorydd mewn Ffarmacoleg Glinigol a Therapiwteg ym Mwrdd Iechyd Prifysgol Betsi Cadwaladr: “Er mai dim ond canlyniadau interim yw'r rhain, mae'n addawol gweld ein bod yn symud i'r cyfeiriad cywir i sicrhau'r pedwerydd brechlyn gobeithio, er mwyn helpu i ymladd yn erbyn COVID-19 a dechrau achub bywydau.

“Cawsom ymateb mor rhyfeddol i’n cais am gyfranogwyr treial yng ngogledd Cymru ac rydym yn ddiolchgar i bawb am roi eu hamser yn anhunanol - heb yr unigolion hynny, ni fyddem wedi gallu cyflawni’r canlyniadau hyn.

“Rydym yn parhau gyda’r treial i gasglu data dilynol a bydd hyn yn ein helpu i ddeall yr amddiffyniad tymor hwy.”

Dywedodd Huw George, Dirprwy Brif Weithredwr Iechyd Cyhoeddus Cymru: “Diolch i bawb sydd wedi cymryd rhan yn y treial hwn, ac i'r gweithwyr proffesiynol ymroddedig sydd wedi gweithio mor galed ar yr ymchwil pwysig hwn. Mae'r canfyddiadau dros dro hyn yn ein calonogi, a gobeithiwn y bydd y treial hwn yn parhau i esgor ar ganlyniadau addawol. Gobeithiwn y gellir ychwanegu'r brechlyn hwn yn y pen draw at y brechlynnau cyfredol sydd ar gael, a chwarae rhan bwysig yn y frwydr yn erbyn Coronafeirws.”

Dywedodd Dr Nicola Williams, Cyfarwyddwr Cymorth a Chyflenwi yn Ymchwil Iechyd a Gofal Cymru, sydd yn genedlaethol yn cydlynu ymchwil a sefydlu astudiaethau yng Nghymru: “Rydym yn falch o'r cyfraniad y mae Cymru yn ei wneud wrth chwilio am frechlynnau.

“Mae angen nifer o frechlynnau ac ymchwil parhaus arnom i helpu i guro’r feirws ac rydym yn gweithio gyda phartneriaid cenedlaethol i barhau â’r rhaglen treialu brechlyn. Mae ein cymuned ymchwil a'n staff iechyd a gofal cymdeithasol yn gwneud gwahaniaeth gwirioneddol i ddod o hyd i ateb parhaol i'r pandemig.”

I gael mwy o wybodaeth am yr holl astudiaethau ymchwil cysylltiedig sy'n weithredol, neu sydd wedi'u sefydlu, yng Nghymru ymwelwch ag ymchwil COVID-19 yng Nghymru.