Dr John Ingram

Mae Dr John Ingram yn Uwch-ddarlithydd Clinigol a Dermatolegydd Ymgynghorol er Anrhydedd ym Mhrifysgol Caerdydd, y DU. Mae ei brif ymchwil a’i ddiddordeb clinigol mewn dermatosis llidiol, yn bennaf hidradenitis suppurativa (HS), gyda Chymrodoriaeth Ymchwil pum mlynedd oddi wrth Ymchwil Iechyd a Gofal Cymru o 2014 i 2019 yn ei gefnogi. Ym maes HS, mae Dr Ingram wedi arwain sawl prosiect ar y cyd gan gynnwys y Bartneriaeth Gosod Blaenoriaeth HS, adolygiad Cochrane o Ymyriadau ar gyfer HS, a Grŵp Datblygu Canllawiau HS Cymdeithas Dermatolegwyr Prydain. Mae’n sylfaenydd ac yn aelod o Grŵp Llywio HISTORIC, sef Cydweithrediad Rhyngwladol set deilliannau craidd hidradenitis suppurativa. Mae hefyd yn awdur y ddwy bennod yn UpToDate® sy’n edrych ar HS. Ar hyn o bryd, mae Dr Ingram yn Olygydd Etholedig ar Gyfnodolyn Dermatoleg Prydain, un o’r cyfnodolion dermatoleg pwysicaf drwy’r byd i gyd, a daeth yn Olygydd yn ddiweddarach yn 2019.

Mae Dr Ingram yn cyd-olygu’r Rook Handbook, sef llawlyfr clinigol cryno wedi’i seilio ar y gwerslyfr Rook gwreiddiol, sydd i’w gyhoeddi ym mis Mehefin 2019. Cyn hyn roedd yn arwain Diploma mewn Dermatoleg Ymarferol ym Mhrifysgol Caerdydd, sef cwrs e-ddysgu y mae cannoedd o Feddygon Teulu wedi’i astudio. Mae Dr Ingram yn gynghorydd i’r Sefydliad Cenedlaethol dros Ragoriaeth mewn Iechyd a Gofal (NICE), grŵp cymorth cleifion Ymddiriedolaeth HS ac Adran Gwaith a Phensiynau’r DU ynglŷn ag anabledd HS. Mae Dr Ingram yn raddedig o ysgol feddygol Prifysgol Rhydychen a gwnaeth ei astudiaeth DM (PhD) yn Rhydychen mewn ymchwil ym maes colitis.

Yn y newyddion:

Mae Ymchwil Iechyd a Gofal Cymru yn buddsoddi mewn arweinwyr ledled Cymru i lywio ymchwil y dyfodol (Ebrill 2022)