Yr Athro Alan Parker

Mae Alan Parker yn Athro Firoleg Drosiadol ac yn Bennaeth Canserau Solet, wedi'i leoli yn Ysgol Feddygaeth Prifysgol Caerdydd.  

Cyn symud i Gaerdydd yn 2013, roedd Alan yn Gymrawd Ymchwil Bersonol Cymdeithas Frenhinol Caeredin ym Mhrifysgol Glasgow (2005-2013), ac yn Gydymaith Ymchwil Ôl-ddoethurol yng Ngholeg y Brenin Llundain (2003-2005).  Dyfarnwyd ei PhD (1998-2002) gan Sefydliad Astudiaethau Canser CRUK ym Mhrifysgol Birmingham.  

Mae gan Alan ddiddordeb hirsefydlog mewn datblygu cynhyrchion meddyginiaethol therapi uwch (sef ATMPs), gan gynnwys therapïau genynnau a chelloedd, i drin clefydau o angen clinigol sydd heb eu diwallu. Er mwyn datblygu ATMPs effeithiol sy'n fwy addas ar gyfer cymwysiadau clinigol, mae ymchwil Alan yn ymchwilio i'r adenofirws, gan integreiddio setiau data strwythurol, biolegol a biowybodeg i ddiffinio'n well y rhyngweithiadau rhwng firws a chelloedd lletyol sy'n diffinio heintiau pathogenig.  Gan ddefnyddio'r wybodaeth hon, mae ei dîm yn peiriannu llwyfannau firaol i ddarparu priflwythi DNA therapiwtig i dargedu celloedd mewn modd sy'n gell-benodol. Y dechnoleg arweiniol gyntaf a gynhyrchir yn ei labordy yw asiant gwrthganser sy'n cyflenwi priflwythi trwy'r marciwr tiwmor penodol αvβ6 integrin. Mae'r dechnoleg hon wedi'i thrwyddedu i Accession Therapeutic Ltd, lle mae Alan yn Brif Swyddog Gwyddonol, ac mae wedi mynd i mewn i dreialon clinigol cyfnod cynnar yn llwyddiannus yn 2025.   

Mae Alan yn llysgennad gweithgar o ran Gwyddoniaeth, Technoleg, Peirianneg, a Mathemateg ac yn eiriolwr dros ymgysylltu â'r cyhoedd, gan hyd yn oed ddatblygu ystafell ddianc benodol i wella dealltwriaeth y cyhoedd o sut y gellir defnyddio firysau at ddibenion therapiwtig. Mae hefyd wedi ymrwymo i ddatblygu cyfleoedd i'r genhedlaeth nesaf o wyddonwyr a hyrwyddo cyfleoedd ar gyfer datblygu Ymchwilwyr Gyrfa Gynnar.