Swyddog Ymchwil - Rhwydwaith Cenedlaethol Ymchwil Gardiofasgwlaidd

Mae'r Rhwydwaith Cenedlaethol Ymchwil Gardiofasgwlaidd (NCRN) yng Nghymru yn recriwtio Swyddog Ymchwil i hwyluso ymchwil gardiofasgwlaidd effeithiol ar sail data.

Rydym yn chwilio am Swyddog Ymchwil uchel ei gymhelliant a medrus iawn ag uchelgais cryf i ddatblygu ei yrfa i ymuno â'r Rhwydwaith Cenedlaethol Ymchwil Gardiofasgwlaidd (NCRN) yng Nghymru a ariennir gan Ymchwil Iechyd a Gofal Cymru a'r British Heart Foundation. Byddwch chi'n gweithio yn y Grŵp Gwyddor Data Poblogaethau ym Mhrifysgol Abertawe, ac yn gweithio'n agos gyda chyd-arweinwyr yr NCRN ar gyfer Data a Dadansoddeg Uwch yn Abertawe a Phrifysgol Metropolitan Caerdydd. Bydd y rôl hon yn canolbwyntio ar ddatblygu, rheoli a dadansoddi setiau data cysylltiedig ar raddfa fawr, yn bennaf ym Manc Data SAIL, i fynd i'r afael â chwestiynau ymchwil hanfodol am iechyd cardiofasgwlaidd ag effaith byd go iawn.

Bydd deiliad y swydd yn chwarae rôl allweddol wrth droi cwestiynau iechyd cardiofasgwlaidd yn amcanion data y gellir gweithredu arnynt gan greu allbynnau rhagarweiniol i asesu dichonoldeb prosiect o fewn themâu’r NCRN. Bydd yn gweithio'n agos gyda thîm rhyngddisgyblaethol o ymchwilwyr ar draws prifysgolion yng Nghymru, cydweithwyr yn y GIG, a phartneriaid allanol i guradu setiau data ansawdd uchel, rheoli cronfeydd data diogel, a chyfrannu at gyhoeddiadau a cheisiadau am gyllid effeithiol.

Mae'r swydd hon hefyd yn cynnig cyfleoedd cyffrous i ddatblygu gyrfa ynghyd â’r posibilrwydd o gofrestru ar gyfer PhD. Bydd deiliad y swydd yn cael ei fentora a'i gefnogi i gyflwyno cais am gyllid ymchwil - yn annibynnol ac mewn cydweithrediad ag ymchwilwyr yr NCRN. Os byddwch yn llwyddo, gall hyn arwain at estyn y contract y tu hwnt i'r cyfnod cychwynnol o 30 mis gyda'r NCRN.

Fel rhan o'r NCRN byddwch yn ymuno ag amgylchedd deinamig a chydweithredol sydd â chysylltiadau cryf â phrifysgolion blaenllaw a rhanddeiliaid eraill ar draws Cymru a’r tu hwnt. Byddwch yn elwa o fynediad at isadeiledd data sy'n arwyddocaol yn genedlaethol a mentora gan wyddonwyr data ac epidemiolegwyr profiadol. Os ydych chi'n angerddol am ddata ac yn ymrwymedig i wella canlyniadau cardiofasgwlaidd, rydym yn eich annog i gyflwyno cais.