Deall llesiant goddrychol plant iau sy'n derbyn gofal yng Nghymru: Astudiaeth ansoddol wedi'i chynllunio gyda phlant mewn gofal gan ddefnyddio methodolegau creadigol

Crynodeb diwedd y prosiect

Prif Negeseuon 

Cyd-destun

Mae llesiant yn elfen graidd o bolisi Llywodraeth Cymru ar gyfer gofal cymdeithasol plant.  Mae'n cynnwys deall a gosod barn y rhai sy'n derbyn gwasanaeth am yr hyn sy'n bwysig iddynt wrth wraidd ein polisïau a'n hymarferion.  Yn rhyngwladol, ychydig iawn o ymchwil sydd wedi bod ar farn plant iau mewn gofal ar eu lles.  Mae ymchwil diweddar hefyd yn awgrymu nad yw gweithwyr cymdeithasol ac eraill yn teimlo'n hyderus nac yn fedrus wrth archwilio lles gyda phlant iau ac felly'n tueddu i beidio â gwneud hynny.   

Mae ymchwil ryngwladol ar les goddrychol plant (yr hyn y mae plant eu hunain yn ei ystyried yn bwysig i'w lles) yn faes diweddar ond sy'n datblygu'n gyflym.  Mae astudiaethau ansoddol a meintiol wedi digwydd ond yn bennaf gyda phlant yn y boblogaeth gyffredinol.  Yng Nghymru, cynhaliwyd yr arolwg rhyngwladol cyntaf o blant ysgol ym mlynyddoedd 6 ac 8 yn 2018. O'i gymharu â gwledydd eraill, tueddai plant yng Nghymru i adrodd am les goddrychol is.  Ni chynhaliwyd astudiaeth ansoddol o les goddrychol plant yng Nghymru, naill ai gyda phlant yn y boblogaeth gyffredinol neu gyda grwpiau mwy agored i niwed.

Crynodeb o'r Prosiect  

Nod yr astudiaeth hon oedd mynd i'r afael â'r bylchau hyn drwy ganolbwyntio ar beth oedd plant oedran ysgol gynradd (blynyddoedd 5 a 6) sydd mewn gofal maeth yn meddwl sy'n bwysig iddyn nhw. Roedd yr astudiaeth yn cynnwys 26 o blant mewn gofal maeth, ac yn bennaf mewn gofal maeth tymor hir, o bedwar awdurdod lleol yng Nghymru. Dros bedair sesiwn a oedd yn gyfeillgar i blant, creodd y plant fapiau lles personol, mapiau lleoedd a lles a rhithffurfiau ar gyfer ffilmiau byr. Gwnaethom archwilio'r bobl, y lleoedd, yr eiddo a'r gweithgareddau yr oedd y plant yn eu hystyried yn bwysig i'w lles ac, o ddiddordeb cyfartal, eu rhesymu. Roedd y cyfweliadau yn cael eu harwain gan blant ac ymgynghorwyd â phlant ar agweddau allweddol o'r sesiynau.  

Prif ganfyddiadau 

1. Roedd y canlyniadau'n nodi'n glir bod y plant yn ystyried perthnasau yn ganolog i'w synnwyr o les.  Mae'r canfyddiad hwn yn cyd-fynd â'r hyn a geir mewn ymchwil gynharach â phlant iau yn y boblogaeth gyffredinol.  
2. Yn amlwg, roedd y plant yn llywio dwy set o berthnasoedd teuluol pwysig ar yr un pryd ac roedd tystiolaeth bod llawer yn rheoli hyn drwy 'eu rhannu'.   
3. Pa wahaniaeth y gall teulu maeth ei wneud i les plentyn.  Yn gyffredinol, roedd y plant yn ffynnu yng ngofal eu teuluoedd maeth tymor hir lle'r oeddent yn teimlo'n ddiogel, yn sefydlog, ac yn cael eu caru. 
4. Gwerth sgyrsiau lles gyda phlant mewn gofal ar gyfer datblygu polisi ac ymarfer yng Nghymru. Gallai integreiddio'r rhain, i adolygiadau statudol 6 mis plant, gyfoethogi penderfyniadau.