'Yng Nghymru, a yw modelau cyfoes o ofal cymdeithasol rheng flaen i bobl sydd â salwch meddwl rheolaidd yn addas i'r diben?: astudiaeth dulliau cymysg'.

Crynodeb

Mae polisi Llywodraeth Cymru yn cydnabod bod darparu cymorth cymdeithasol yn y gymuned yn gymhleth.  Maen nhw'n cyflwyno cynlluniau i greu gwasanaethau sy'n cydgysylltu'n well, er mwyn diwallu anghenion y bobl sy'n eu defnyddio. Bydd disgwyl i wasanaethau helpu pobl i fod yn annibynnol ac i gyflawni canlyniadau sy'n gwella'u lles.  

Nod set ar wahân o amcanion Llywodraeth Cymru, o'r enw Gwaith Teg, yw gwella amodau gwaith staff gofal cymdeithasol rheng flaen.  Bydd y rhain yn galluogi staff i weithio mewn ffordd effeithiol a chefnogol, er mwyn helpu pobl i gyflawni nodau y maent yn eu gosod iddynt eu hunain.  

Mae'r astudiaeth PhD hon yn ymwneud â phobl sy'n profi cyfnodau o salwch meddwl dro ar ôl tro. Ychydig sy'n hysbys am ba mor dda mae gwahanol ffyrdd o ddarparu cymorth yn gweithio i bobl.  Yn benodol, nid ydym yn gwybod fawr ddim am eu heffeithiolrwydd wrth gyflawni nodau sy'n bwysig i'r defnyddwyr gwasanaeth eu hunain.  Nid ydym yn gwybod pa mor dda y mae eu hanghenion yn cael eu diwallu, na pha agweddau ar gefnogaeth sy'n cael eu gwerthfawrogi fwyaf.  Nid ydym yn gwybod beth yw'r trefniadau gorau i gefnogi staff gofal cymdeithasol yn eu gwaith.  

Bydd yr astudiaeth yn mynd i'r afael â'r cwestiynau hyn gan ddefnyddio cyfweliadau ac arolygon gyda staff a defnyddwyr gwasanaeth.  Mae pobl sydd â phrofiad byw o salwch meddwl yn aelodau o'r tîm ymchwil.  Maent wedi bod yn rhan o gynllunio'r prosiect o'r cychwyn cyntaf.  Fel aelodau o'r tîm goruchwylio, byddant yn ymwneud yn llawn â chyflwyno a hyrwyddo ein canlyniadau.  

Bydd y myfyriwr PhD yn astudio sawl gwasanaeth mewn gwahanol leoliadau yng Ngogledd Cymru.  Byddant wedi'u lleoli yn y Ganolfan Iechyd Meddwl a Chymdeithas, Prifysgol Bangor, sydd wedi'i lleoli yn Wrecsam.  Y prif oruchwyliwr yw'r Athro Huxley, gweithiwr cymdeithasol sydd â degawdau o brofiad lles o ymarfer ac ymchwil mewn Iechyd Meddwl.  Bydd yn arwain tîm goruchwylio a fydd yn cwrdd â'r myfyriwr yn rheolaidd.