Ysbyty Abertawe yw'r cyntaf yng Nghymru i recriwtio babanod sâl ar gyfer treial clinigol y DU
12 Mawrth
Ysbyty Treforys yw'r cyntaf yng Nghymru i ddechrau recriwtio ar gyfer treial ledled y DU ar gyfer babanod sâl sydd angen help gyda'u hanadlu, diolch i gefnogaeth hanfodol gan Ymchwil Iechyd a Gofal Cymru.
Bydd y treial yn anelu at bennu'r cymorth anadlu mwyaf effeithiol i fabanod sy'n cael eu cludo i'r ysbyty gyda bronciolitis, haint cyffredin ar y frest sy'n effeithio ar fabanod a phlant o dan ddwy oed. Mae miloedd o blant angen mynd i'r ysbyty bob blwyddyn oherwydd heintiau difrifol ar y frest.
Bydd y treial BACHb gwerth £1.7 miliwn yn recriwtio dros 1,500 o fabanod o 50 ysbyty ledled y DU dros gyfnod o 30 mis. Ysbyty Treforys, sy'n rhan o Fwrdd Iechyd Prifysgol Bae Abertawe, yw'r cyntaf yng Nghymru i gymryd rhan. Mae'r treial yn ceisio nodi'r cymorth anadlu mwyaf effeithiol i'r babanod hyn.
Dr Huma Mazhar, pediatregydd ymgynghorol ac arweinydd anadlol yn Nhreforys, yw prif ymchwilydd y treial. Dywedodd hi: "Mae cymryd rhan yn y treialon hyn o fudd nid yn unig i gleifion ond hefyd i feddygon iau, gan roi cyfleoedd gwerthfawr iddynt ddatblygu sgiliau ymchwil hanfodol.
"Mae ymchwil yn hanfodol i ddatblygiad gofal iechyd, gan alluogi triniaethau i gael eu harwain gan y dystiolaeth ddiweddaraf."
Cydnabu Dr Mazhar hefyd y nyrs ymchwil Gemma Smith, a ariannwyd hefyd gan Ymchwil Iechyd a Gofal Cymru, am ei rôl yn sicrhau cyfnod sefydlu llyfn ar gyfer y treial. Dywedodd Gemma: "Fel rhan o'r tîm cyflenwi Ymchwil a Datblygu, mae wedi bod yn bleser hwyluso'r sefydlu a chefnogaeth barhaus ar gyfer y treial hwn. Rydym yn edrych ymlaen at weld hwn fel y cyntaf o lawer o gyfleoedd cydweithio."
Nod y treial yw helpu babanod i wella'n gyflymach, gyda llai o anghysur, ac arosiadau byrrach yn yr ysbyty.
Bydd y treial yn cymharu therapi ocsigen llif uchel, pwysedd llwybr anadlu cadarnhaol parhaus (CPAP), ac ocsigen safonol llaith i bennu'r driniaeth fwyaf effeithiol ar gyfer bronciolitis cymedrol a difrifol mewn babanod sydd o dan 12 mis oed. Bydd dau dreial clinigol yn cael eu cynnal ar yr un pryd i asesu effeithiolrwydd pob triniaeth.
Darllenwch fwy am y treial. Cofrestrwch i'n cylchlythyr wythnosol a chadwch i fyny â'r newyddion ymchwil diweddaraf, a gwybodaeth ddefnyddiol arall.
