Cymru'n arddangos arfer gorau ymchwil mewn cynhadledd genedlaethol

Aeth cynrychiolwyr o Ymchwil Iechyd a Gofal Cymru i Gynhadledd Fforwm Ymchwil a Datblygu'r GIG (Ymchwil a Datblygu) yn Newcastle yr wythnos hon i rannu'r gweithgaredd ymchwil sy'n  digwydd yng Nghymru.

Daeth y digwyddiad, a noddir gan Ymchwil Iechyd a Gofal Cymru, â dros 850 o staff ymchwil o bob rhan o'r DU ynghyd dros ddau ddiwrnod ac roedd yn cynnwys cyflwyniadau gan Carys Thomas, Pennaeth adran Polisi, Ymchwil a Datblygu, Llywodraeth Cymru a Dr Nigel Rees, Pennaeth Ymchwil ac Arloesi, Ymddiriedolaeth GIG Gwasanaeth Ambiwlans Cymru.

Gan ganolbwyntio ar gynhwysiant ac amrywiaeth mewn recriwtio, cyflwynodd Carys y sesiwn lawn olaf ar y diwrnod cyntaf, dywedodd: "Mae cynhwysiad angen ffocws ac ymdrech drwy bob agwedd ar ddylunio a chyflwyno ymchwil, roedd yn bleser siarad â chynrychiolwyr NHS R&D Forum am y pwnc pwysig hwn.

"Mae mynychu digwyddiadau fel hyn yn ffordd hanfodol i ni ddysgu gan gydweithwyr ledled y DU, rhannu'r hyn rydyn ni'n ei wneud yng Nghymru ac ysbrydoli cydweithio ledled y DU."

Bu ymchwil yng Nghymru hefyd yn ganolog yn ystod gweithdai'r digwyddiad gyda sesiwn yn canolbwyntio ar astudiaeth yn ymchwilio i sut y gellid defnyddio deallusrwydd artiffisial yn ddiogel o fewn canolfannau galwadau 999 i gefnogi staff i wneud penderfyniadau.

Dywedodd Dr Rees, a gyflwynodd y sesiwn ar astudiaeth “ASSIST”: "Roedd yn wych bod yn y Fforwm Ymchwil a Datblygu y GIG i arddangos yr holl waith gwych sy'n digwydd yng Nghymru "

Dywedodd Dr Nicola Williams, Cyfarwyddwr Cymorth a Chyflenwi Ymchwil Iechyd a Gofal Cymru, a gadeiriodd Grŵp Datblygu'r Rhaglen Gynadledda ac a agorodd y digwyddiad ar yr ail ddiwrnod: "Nid oes gan ymchwil unrhyw ffiniau, yn ddaearyddol nac fel arall, felly mae'n bwysig ein bod yn gweithio gyda'n cydweithwyr ledled y DU ar sut rydym yn sefydlu a darparu ymchwil. Mae'n wych ein bod ni i gyd yn y digwyddiad gyda'n gilydd."

Y flwyddyn nesaf bydd Cynhadledd Fforwm Ymchwil a Datblygu y GIG yn dychwelyd i Gymru, lle cafodd ei chynnal ddiwethaf yn 2018. Caiff ei gynnal yn y Celtic Manor, Casnewydd ym mis Mai.

Aeth Dr Williams yn ei flaen: "Mae'n gyffrous iawn, rydym yn falch iawn o allu croesawu pawb o bob rhan o'r DU i Gymru yn 2024."

Cewch y wybodaeth ddiweddaraf am ddigwyddiadau ymchwil sy'n digwydd ledled Cymru a thu hwnt drwy ymuno â bwletin Ymchwil Iechyd a Gofal Cymru.