Arweinydd Arbenigedd Ymchwil Iechyd a Gofal Cymru yn ymuno â grŵp newydd gyda'r nod o gryfhau cydweithio rhwng unedau treialon clinigol a Phrif Ymchwilwyr
27 Awst
Mae Arweinydd Arbenigedd Ymchwil Iechyd a Gofal Cymru wedi'i phenodi i weithgor newydd sydd â'r nod o feithrin perthynas gryfach a chydweithrediadau rhwng Unedau Treialon Clinigol a'r gymuned Prif Ymchwilwyr wrth gynnal treialon clinigol.
Mae’r Athro Ceri Battle, Arweinydd Cyd-arbenigedd ar gyfer Trawma a Gofal Brys, sydd wedi derbyn Cymrodoriaeth Ymchwil Iechyd gan Ymchwil Iechyd a Gofal Cymru, yn ymuno â naw Prif Ymchwilydd arall ar Grŵp Rhwydwaith Prif Ymchwilwyr (CING) newydd Cydweithrediad Ymchwil Glinigol y DU, cyhoeddwyd yr wythnos hon.
Gan ddod â phrif ymchwilwyr ynghyd o ystod amrywiol o arbenigeddau a chefndiroedd proffesiynol, bydd CING yn gweithio gyda'i gilydd i nodi heriau a'u datrysiadau, datblygu adnoddau i gefnogi'r cydweithrediad CTU-CI, nodi dulliau a ddefnyddir gan rwydweithiau eraill, a gweithio gyda Grŵp Gweithredol a Chyfarwyddwr Rhwydwaith CTU. Mae CING yn cael ei gadeirio gan gyfarwyddwr clinigol Rhwydwaith CTU, yr Athro Rustam Al-Shahi Salman.
Meddai'r Athro Battle: "Rwy'n falch iawn fy mod wedi cael fy mhenodi i CING ac rwy'n edrych ymlaen at allu rhannu arfer gorau o fy rôl fel Prif Ymchwilydd. Drwy gydweithio ag ystod amrywiol o bobl, gan gynnwys meddygon a gweithwyr gofal iechyd proffesiynol eraill, rydym yn gobeithio mynd i'r afael â rhai o'r heriau a'r materion ymarferol wrth gynnal treialon anfasnachol yn y DU."