Cynllun Uwch-arweinwyr Ymchwil 2025-2028

Mae Ymchwil Iechyd a Gofal Cymru yn falch o gyhoeddi y bydd yr alwad am geisiadau ar gyfer Cynllun Uwch-arweinwyr Ymchwil 2025-2028 yn agor ar 14 Tachwedd.

Mae’r Uwch-arweinwyr Ymchwil Ymchwil Iechyd a Gofal Cymru ymhlith yr ymchwilwyr iechyd a gofal cymdeithasol mwyaf blaenllaw ac uchel eu parch yn y wlad. Maent yn chwarae rhan hanfodol wrth arwain a datblygu’r gymuned ymchwil iechyd a gofal yng Nghymru. Rydym yn dibynnu arnynt i ddarparu arweiniad, gweithredu fel llysgenhadon ac eiriolwyr dros ymchwil iechyd a gofal, a chwarae rhan ganolog i gefnogi’r genhedlaeth nesaf o arweinwyr ymchwil iechyd a gofal yng Nghymru drwy fentora, a thrwy ddarparu cyngor a chefnogaeth i’r gymuned ymchwil. Bydd disgwyl i bob Uwch-arweinydd Ymchwil ymgysylltu â gweithgareddau Cyfadran Ymchwil Iechyd a Gofal Cymru a’u cefnogi.

I gydnabod y rôl bwysig sydd ganddynt a’u cyfraniad at ddatblygu a chefnogi’r gymuned ymchwil iechyd a gofal cymdeithasol yng Nghymru, mae Uwch-arweinwyr Ymchwil yn derbyn dyfarniad blynyddol yn ôl disgresiwn o hyd at £15,000 i gefnogi eu gwaith ymchwil (cyfanswm o £45,000 dros gyfnod y dyfarniad 3 blynedd).

Bydd ymrwymiad amser yr Uwch-arweinwyr Ymchwil yn cynnwys eu bod yn cyfrannu at Ymchwil Iechyd a Gofal Cymru mewn nifer o ffyrdd gan gynnwys drwy baneli, byrddau neu bwyllgorau ariannu, drwy ymgysylltu ar lefel y DU â chyllidwyr a chyrff eraill, a thrwy gyfrannu at ddatblygu capasiti a gallu ymchwil yng Nghymru drwy amrywiaeth o weithgareddau’r Gyfadran.

Rydym yn croesawu ceisiadau gan unigolion sydd:

• yn dangos arweinyddiaeth ymchwil, rhagoriaeth ac effaith yng Nghymru ac yn y DU/yn rhyngwladol;
• yn gallu ymrwymo 10-15 diwrnod y flwyddyn i’r rôl;
• â phrofiad o ddatblygu ymchwilwyr a datblygu gallu a medrusrwydd ymchwil yng Nghymru. Er enghraifft, drwy ddenu, datblygu a chadw gweithlu ymchwil iechyd galluog iawn, drwy gefnogi cydweithio a datblygu rhaglenni ymchwil newydd;
• yn cyfannu cynnwys cleifion/defnyddwyr gwasanaeth a’r cyhoedd mewn ymchwil; ac
• wedi ymrwymo i gyfrannu at Ymchwil Iechyd a Gofal Cymru, gan gynnwys y Gyfadran, fel uwch-arweinydd.

Ceisiadau yn agor: Dydd Iau 14 Tachwedd 2024

Yn Cau: 16:00 ddydd Iau 9 Ionawr 2025.

Mae mwy o wybodaeth ar dudalen we y cynlluniau ariannu.