ENRICH Cymru yn lansio adnoddau i wella ymchwil mewn cartrefi gofal
13 Mehefin
Lansiwyd adnoddau ymchwil ar gyfer rheolwyr cartrefi gofal ac ymchwilwyr mewn digwyddiad Galluogi Ymchwil mewn Cartrefi Gofal (ENRICH) Cymru yn y Senedd yn gynharach eleni, i helpu i oresgyn y rhwystrau i gynnal ymchwil mewn cartrefi gofal a'i gwneud yn fwy hygyrch.
I ymchwilwyr, mae'r cyngor gwych yn yr adnoddau yn annog ymgysylltu mewn ymchwil sy'n canolbwyntio ar berthynas mewn cartrefi gofal, creu perthnasoedd cadarnhaol a chynnal parch a chyfathrebu effeithiol. Mae'r egwyddorion yn cynnwys cyd-gynhyrchu'r ymchwil cyn gynted â phosibl, gan ei gwneud yn hawdd i'r cartref gofal gymryd rhan a bod â llais yn y gwaith o ddylunio a chyflwyno'r astudiaeth.
Mae adnoddau ar gyfer rheolwyr cartrefi gofal yn eu cefnogi i sicrhau bod unrhyw weithgareddau ymchwil yn cael eu teilwra i anghenion preswylwyr a staff y cartref gofal, gan helpu astudiaethau i fod yn fuddiol ac yn bleserus i'r rhai sy'n cymryd rhan.
Cysylltodd Stephanie Green, Cydlynydd Datblygu Ymchwil ENRICH Cymru, â Dr Laura Brown, Uwch Ddarlithydd mewn Seicoleg o Brifysgol Manceinion, pan glywodd hi'n siarad am y rhwystrau ym maes ymchwil mewn cartrefi gofal yng nghynhadledd Cymdeithas Gerontoleg Prydain a'i gwahodd i weithio gyda'r rhwydwaith ar yr adnoddau i baratoi'r ffordd ar gyfer ymchwil fwy effeithiol mewn cartrefi gofal.
Arweiniodd hyn at gynnal gweithdy ENRICH Cymru gyda Dr Brown, ym mis Rhagfyr 2024, a oedd yn cynnwys rheolwyr cartrefi gofal a staff o Pilipala Care Ltd, Canolfan Gofal Sŵn-y-Môr, grŵp Hafod Care yn ogystal ag ymchwilwyr cartrefi gofal o Brifysgol Metropolitan Caerdydd a Phrifysgol Abertawe, i gyd-gynhyrchu'r adnoddau.
Dywedodd Dr Brown: "Mae sefydlu a chynnal ymchwil, mewn ffordd sy’n gyfforddus i gartrefi gofal ac ymchwilwyr bob amser wedi bod yn her. Rydym am ei gwneud mor hawdd â phosibl i bontio'r bwlch ar gyfer cartrefi gofal ac ymchwilwyr ac rydym yn gobeithio y bydd yr adnoddau hyn yn helpu.
"Rwy'n gobeithio bod y rhain yn fan cychwyn ar gyfer ymchwil, a byddwn yn eu hadolygu a'u diwygio yn y blynyddoedd i ddod. Os oes gan bobl syniadau gwahanol neu'n canfod nad yw pethau'n gweithio neu sefyllfaoedd yn newid, byddem wrth ein bodd pe byddai pobl yn rhoi gwybod i ni beth sy’n gweithio ac sydd ddim yn gweithio iddyn nhw."
Dywedodd Stephanie:
Rydyn ni'n falch iawn o fod wedi gweithio gyda Laura a phawb a fu’n rhan o greu'r adnoddau hyn. Rydym yn gobeithio y byddant yn annog mwy o ymchwilwyr i ystyried cartrefi gofal yn eu hymchwil ac i gartrefi gofal ymuno â'r rhwydwaith a chymryd rhan mewn ymchwil sy'n newid bywydau."
Gweld yr adnoddau cyngor gwych:
Os hoffech ddysgu mwy am rwydwaith ENRICH Cymru a sut y gallai eich helpu chi fel ymchwilydd neu gartref gofal, darllenwch sut y gallant eich helpu.
