Cynllun Ymchwilydd sy’n Datblygu

Mae Ymchwil Iechyd a Gofal Cymru yn falch o gyhoeddi bod yr alwad am geisiadau ar gyfer Dyfarniad Ymchwilydd sy’n Datblygu bellach ar agor.

Bydd y cylch yn cau ar gyfer ceisiadau ddydd Iau 9 Hydref am 16:00. Ni fydd ceisiadau hwyr yn cael eu hystyried.

Gwnewch gais nawr gan ddefnyddio System Rheoli Dyfarniadau’r Gyfadran                                                               

Mae’r Cynllun Ymchwilydd sy’n Datblygu yn ddyfarniad personol a’i ddiben yw hyrwyddo gyrfaoedd ymchwil ar gyfer ymchwilwyr iechyd a gofal cymdeithasol yng Nghymru. Mae’n cynnig cyllid i alluogi amser wedi’i neilltuo i gymryd rhan mewn gweithgareddau ymchwil datblygiadol a chyllid i ganiatáu costau nad ydynt yn rhai staff (megis teithio a chynhaliaeth, costau cynnwys y cyhoedd a chostau hyfforddiant). Mae’r cynllun yn rhoi cefnogaeth hyblyg a chynhwysol i ymchwilwyr yng nghanol eu gyrfaoedd ymchwil. Felly, disgwylir i bob ymgeisydd gyfiawnhau’n glir pam mae’r cynllun yn briodol iddo ar ei gam gyrfa ymchwil. Dylai ymgeiswyr fod yn ymwybodol o’r angen i gyfiawnhau’n glir sut y bydd yr amser wedi’i neilltuo y gofynnir amdano yn eu galluogi i ddatblygu yn eu gyrfaoedd ymchwil. 

Mae’r Cynllun Ymchwilydd sy’n Datblygu wedi’i ddatblygu i hwyluso cynnydd ymchwilwyr  canol gyrfa wrth iddynt bontio a symud ymlaen i’r cam nesaf o’u gyrfa ymchwil iechyd a gofal cymdeithasol. Gallai hyn gynnwys y gweithgareddau datblygu sy’n ofynnol i arwain neu gyd-arwain unrhyw raglen waith sylweddol, er enghraifft, cymrodoriaethau ôl-ddoethurol a grantiau prosiectau mawr gan gynnwys hap-dreialon dan reolaeth. 

Byddwn hefyd yn ystyried cynigion sy'n arwain at gyflwyno PhD trwy Weithiau Cyhoeddedig yn gymwys ar gyfer y cynllun hwn, os yw ymgeiswyr eisoes wedi cwblhau ymchwil berthnasol ac wedi cyhoeddi'r nifer angenrheidiol o bapurau ymchwil unigol fel awdur cyntaf. Byddai'r dyfarniad hwn wedyn yn rhoi'r amser gwarchodedig i ymgeiswyr ysgrifennu cydrannau integreiddio'r PhD.  Gweler 'yr hyn y byddwn yn ei ariannu' am ganllawiau cyllid pellach ar PhD trwy Weithiau Cyhoeddedig. 

Mae’r Cynllun Ymchwilydd sy’n Datblygu yn agored i ymchwilwyr canol gyrfa wedi’u cyflogi  gan Sefydliadau Addysg Uwch (SAU), neu staff ymchwil gweithredol a gyflogir gan y GIG neu sefydliadau gofal cymdeithasol yng Nghymru. 

Efallai y byddai ymgeiswyr sy’n cynllunio PhD trwy weithiau cyhoeddedig, fel arall yn cael eu disgrifio fel ymchwilwyr gyrfa gynnar, ond yn yr achos hwn, bydd eu hanes o gyhoeddi fel yr awdur cyntaf yn eu gosod yn gydradd ag ymchwilwyr canol gyrfa. 

Mae ymgeiswyr llwyddiannus ar gyfer y dyfarniad hwn yn dod yn aelodau o Gyfadran Ymchwil Iechyd a Gofal Cymru yn awtomatig. Mae bod yn aelod o’r Gyfadran yn golygu cael mynediad at amrywiaeth o gyfleoedd dysgu, datblygu a rhwydweithio sydd â’r bwriad o ysgogi a thyfu’r gymuned ymchwil yng Nghymru. Bydd disgwyl i holl ddeiliaid dyfarniadau personol y Gyfadran ymgysylltu â gwaith y Gyfadran. Dylai ymgeiswyr fanylu ar sut y byddant yn cymryd rhan mewn cyfleoedd y Gyfadran yn ogystal â sut y byddant yn cael eu cefnogi gan y sefydliad lletyol trwy gydol cyfnod eu dyfarniad ac ar ôl cwblhau eu dyfarniad. 

Rhaid bod ymgeiswyr yn:

• bodloni’r holl feini prawf cymhwysedd a nodir yn adran 1.3 isod
• dangos ansawdd y gweithgareddau ymchwil y maent yn bwriadu cymryd rhan ynddynt;
• dangos cysylltiad â grŵp ymchwil o ansawdd uchel megis:
  • grŵp a ariennir gan Ymchwil Iechyd a Gofal Cymru
  • canolfan neu uned a ariennir gan ariannwr o ansawdd uchel nad yw’n aelod o Lywodraeth Cymru fel y Cyngor Ymchwil Feddygol (MRC), UK Research Innovation (UKRI) neu’r Sefydliad Cenedlaethol ar gyfer Ymchwil Iechyd a Gofal (NIHR)
  • grŵp ymchwil sydd â hanes o lwyddiant o ran ennill grantiau gan gyllidwyr o ansawdd uchel fel y cynghorau ymchwil, Y Sefydliad Cenedlaethol ar gyfer Ymchwil Iechyd a Gofal, neu gyllidwyr ymchwil trydydd sector sylweddol (megis Ymddiriedolaeth Wellcome neu Cancer Research UK)
• cael cefnogaeth ddangosadwy gydag uned treialon cofrestredig UK Clinical Research Collaboration (UKCRC) a chefnogaeth methodolegydd treialon fel un o’ch mentoriaid, os ydych chi’n gwneud cais am weithgaredd datblygu i gefnogi treial ar hap dan reolaeth yn y dyfodol
• disgrifio’r angen heb ei ddiwallu yn eu meysydd gweithgarwch arfaethedig a’r effaith a’r manteision posibl i’r cyhoedd yn ehangach yn ogystal â chleifion, gofalwyr a defnyddwyr gwasanaeth yng Nghymru
• cynnwys paragraff sy’n esbonio ac yn cyfiawnhau eu dewis o ran pam mae’r cynllun penodol hwn yn briodol iddynt yn eu gyrfa ymchwil. Ni fydd Ymchwil Iechyd a Gofal Cymru yn ariannu ceisiadau sy’n addas i’w cyflwyno i gyllidwyr eraill ledled y DU, megis y Sefydliad Cenedlaethol ar gyfer Ymchwil Iechyd a Gofal, y Cyngor Ymchwil Feddygol, UKRI, Ymddiriedolaeth Wellcome, Nuffield Foundation a chyllidwyr elusennau mawr eraill.
• nodi sut y gallant neilltuo’r cyllid y maent yn ymgeisio amdano i’w gweithgareddau ymchwil am gyfnod y dyfarniad yn ychwanegol at unrhyw weithgaredd ymchwil sydd eisoes wedi’i ariannu neu’r ddyrannu. 

Gall ymgeiswyr wneud cais am hyd at:

• £50,000 am uchafswm o flwyddyn. Gall ymgeiswyr gynnwys cyflog a chostau, yn ogystal â gweithgareddau cysylltiedig fel teithio a chynhaliaeth, cynnwys cleifion a’r cyhoedd, costau hyfforddi a chofrestru myfyrwyr, yn achos PhD trwy weithiau cyhoeddedig lle nad yw cyllid arall wedi’i sicrhau. Gellir defnyddio’r cyllid hwn i gefnogi presenoldeb mewn digwyddiadau’r Gyfadran.

Mae disgwyliad y bydd ymgeiswyr llwyddiannus, yn ystod y dyfarniad, yn chwilio am gyfleoedd i wneud cais am gyllid ymchwil yn y dyfodol i gynnal a datblygu eu gweithgaredd ymchwil y tu hwnt i’r cyfnod dyfarnu.

Sylwer: 

• mae hwn yn ddyfarniad personol, nid grant prosiect. Mae hyn yn golygu na fydd yr ariannwr yn talu costau ymchwil fel y maent wedi’u diffinio gan ganllawiau AcoRD. Mae hyn yn darparu canllawiau ar gyfer priodoli costau ymchwil a datblygu iechyd a gofal cymdeithasol. Bydd y Cynllun Ymchwilydd sy’n Datblygu yn rhoi cyllid ar gyfer costau rhesymol nad ydynt yn rhai staff, megis teithio a chynhaliaeth, hyfforddiant a datblygu a chostau ar gyfer cyfranogiad y cyhoedd;
• nid yw’r dyfarniad hwn yn gymwys i’w mabwysiadu’n awtomatig i Bortffolio Ymchwil Iechyd a Gofal Cymru. Fodd bynnag, gall ymgeiswyr wneud cais am y dyfarniad ac yna ystyried a yw unrhyw brosiect penodol y maent yn dymuno gweithio arno yn bodloni meini prawf mabwysiadu’r portffolio
• Mae hon yn broses ymgeisio un cam

Yr hyn y byddwn yn ei ariannu

Bydd Ymchwil Iechyd a Gofal Cymru yn ariannu:

• amser i’ch galluogi i gymryd rhan mewn gweithgarwch datblygu ymchwil, gan gynnwys ffurfio damcaniaeth, nodi a blaenoriaethu cwestiynau ymchwil a chynigion ymchwil a gwaith datblygu grant a fydd yn arwain at allbynnau a fydd yn datblygu gweithgareddau a ariennir yn y dyfodol
• amser wedi’i neilltuo i ysgrifennu cydrannau cyfannu’r PhD
• amser i ddatblygu allbynnau a fydd yn datblygu gweithgareddau ymchwil wedi’u hariannu yn y dyfodol
• amser i ymgymryd â gweithgareddau hyfforddi a datblygu perthnasol
• costau rhesymol nad ydynt yn rhai staff i gefnogi gweithgareddau cysylltiedig megis teithio a chynhaliaeth, hyfforddiant a datblygu, costau ar gyfer cynnwys y cyhoedd a chofrestru myfyrwyr, yn achos PhD trwy weithiau cyhoeddedig lle nad yw cyllid arall wedi’i sicrhau. Gellir defnyddio’r cyllid hwn i gefnogi presenoldeb yn nigwyddiadau’r Cyfadran.

Bwriedir i’r rhestr hon fod yn ddangosol yn hytrach nag yn diffiniol. 

Yr hyn na fyddwn yn ei ariannu:

• fel y nodwyd uchod, ni fyddwn yn talu costau ymchwil fel y maent wedi’u diffinio gan ganllawiau AcoRD gan y mae’n berthnasol i brosiectau ymchwil a ariennir yn allanol, gan y dylai’r rhain gael eu cynnwys gan ariannwr y prosiect ac nid eu hategu gan adnoddau o’r cynllun hwn na chymryd eu lle.
• ni fydd y dyfarniad yn ariannu, ac ni ddylid ei defnyddio i ariannu, prosiectau presennol nac amser ymchwil ychwanegol ar brosiectau presennol
• ni fydd y dyfarniad yn ariannu unrhyw amser ymchwil wedi’i gynnwys gan drefniadau presennol sydd wedi’u nodi o fewn contractau cyflogaeth presennol
• nid yw’r dyfarniad wedi’i fwriadu i gynnwys amser a ddefnyddir i oruchwylio myfyriwr PhD. Mae hwn yn ddyfarniad personol, a’i nod yw datblygu llwybrau gyrfa personol ymgeiswyr yn hytrach na chefnogi datblygiad pobl eraill, fel myfyrwyr PhD
• ni fydd y dyfarniad yn talu costau sy’n gysylltiedig â Doethuriaethau Proffesiynol.

Meini prawf cymhwysedd

Rhaid i ymgeiswyr fodloni’r meini prawf canlynol:

• mae’n rhaid bod ymgeiswyr wedi’u cyflogi gan Sefydliadau Addysg Uwch Cymru, GIG Cymru, Awdurdodau Lleol (gwasanaethau gofal cymdeithasol i oedolion neu blant), neu sefydliadau eraill sy’n gweithio ar bwnc/maes ymchwil sy’n uniongyrchol berthnasol i flaenoriaethau ymchwil iechyd a gofal cymdeithasol Cymru. Gallai hyn gynnwys eu bod wedi’u lleoli mewn awdurdod lleol neu asiantaeth arall e.e. darpariaeth iechyd a gofal cymdeithasol annibynnol fel gofal sylfaenol, fferylliaeth gymunedol, gofal preswyl i oedolion neu blant, neu ofal cartref yng Nghymru. Rhaid bod gan weithwyr Sefydliadau Addysg Uwch y systemau cymorth a chynnal perthnasol ar waith gyda Sefydliad Addysg Uwch Cymru drwy gydol y dyfarniad
• bydd angen i ymgeiswyr o sefydliadau addysg uwch sy’n cael eu cyflogi ar sail cyflog wedi’i ddyrannu’n uniongyrchol gyfiawnhau pam y dylid talu eu cyflog.
• Bydd angen i ymgeiswyr sy’n cael eu cyflogi ar sail costau cyflog a geir yn uniongyrchol
• yn ddelfrydol, rhaid i ymgeiswyr fod mewn sefyllfa i ddechrau gweithgareddau erbyn 1 Ebrill 2026 (gellir ystyried gohirio’r dyddiad hwn mewn amgylchiadau eithriadol, e.e. bod y sefydliad cyflogi yn cael trafferth i ôl-lenwi’r swydd)
• Rhaid i ymgeiswyr gael cefnogaeth eu rheolwr llinell, pennaeth adran a chyfarwyddwr ymchwil a datblygu (neu lofnodwyr cyfatebol perthnasol eu sefydliad contractio)
• Rhaid bod gan ymgeiswyr oruchwyliwr ymchwil neu fentor(ion) penodol. Yn y rhan fwyaf o achosion, ni ddylai hwn fod yn rheolwr llinell presennol yr ymgeisydd gan y byddai’n cael ei dybio ei fod eisoes yn mentora a chefnogi’r ymgeisydd, ac yn hytrach dylai’r rôl hon fod yn ychwanegol at drefniadau cymorth presennol/arferol.
• gall ymgeiswyr ddal dim mwy na dwy ddyfarniad Ymchwilydd sy’n Datblygu a dylent fod wedi rhoi tystiolaeth o effeithiau clir unrhyw ddyfarniadau blaenorol y Gyfadran Ymchwil Iechyd a Gofal.

gael cadarnhad gan eu sefydliadau addysg uwch lletyol y bydd contract cyflogaeth sy’n cynnwys cyfnod cyfan y dyfarniad yn cael ei ddyfarnu os byddant yn llwyddiannus

Sut i wneud cais

Mae’r alwad hon yn cau i geisiadau ddydd Iau 9 Hydref am 16:00.

Dylid llenwi’r ffurflen gais gan ddefnyddio System Rheoli Dyfarniadau Cyfadran Ymchwil Iechyd a Gofal Cymru. Sylwch y bydd yn ofynnol i lofnodwyr awdurdodedig gadarnhau cyfranogiad yn ystod y broses ymgeisio, felly dylid rhoi digon o amser iddynt ymateb cyn y dyddiad cau ar gyfer cyflwyno ceisiadau.

Meini prawf asesu

Bydd y panel yn asesu pob cais yn seiliedig ar y meini prawf canlynol:

• effaith bosibl a gwerth ychwanegol y gweithgareddau arfaethedig ar lwybr gyrfa ymchwil yr ymgeisydd
• eglurder a diben y gweithgareddau arfaethedig
• ansawdd yr amgylchedd ymchwil, cydweithiwr neu gydweithiwr academaidd a goruchwyliwr ymchwil neu fentor, yng nghyd-destun y cynllun arfaethedig
• eglurder a diben cynlluniau y tu hwnt i gyfnod y dyfarniad
• disgrifiad o’r angen heb ei ddiwallu ym meysydd gweithgarwch penodedig a’r effaith bosibl ar y gwasanaethau a ddarperir i’r cyhoedd, cleifion, defnyddwyr gwasanaeth a gofalwyr
• ystyriaeth lawn o gynnwys y cyhoedd mewn gweithgareddau cyllido arfaethedig ac fel rhan o ddatblygu’r cais hwn
• y cyfiawnhad a ddarperir dros wneud cais i’r cynllun penodol hwn ar gam gyrfa ymchwil yr ymgeisydd a thystiolaeth o effeithiau clir unrhyw ddyfarniadau blaenorol y Gyfadran Ymchwil Iechyd a Gofal a/neu gyllid seilwaith ymchwil Iechyd a Gofal Cymru lle roedd yr ymgeisydd yn ymgeisydd neu’n gyd-ymgeisydd wedi’i enwi
• cefnogaeth y rheolwr llinell a’r sefydliad cyflogi, yn ystod ac ar ôl cyfnod y dyfarniad.

Bydd y panel yn gwneud argymhellion cyllido i Ymchwil Iechyd a Gofal Cymru (Llywodraeth Cymru). Bydd Ymchwil Iechyd a Gofal Cymru (Llywodraeth Cymru) yn gwneud y penderfyniadau ariannu terfynol, gan ystyried cryfder argymhellion y panel a’r adnoddau sydd ar gael. Mae’r penderfyniadau hyn yn derfynol ac nid yw’n bosibl eu hapelio.

Mae Cyfadran Ymchwil Iechyd a Gofal Cymru yn disgwyl rhoi gwybod y canlyniad i bob ymgeisydd ym mis Chwefror 2026.

Cymhorthfa Dyfarniadau

Ymunwch â’n Cynghorwyr Datblygu Ymchwilwyr mewn cymhorthfa dyfarniadau am y cyfle i ofyn unrhyw gwestiynau am y Dyfarniadau Ymchwilydd sy’n Datblygu.

• Dydd Llun 8 Medi 11:00 – 12:00
• Dydd Mercher 24 Medi 10:30 – 11:30

Archebwch eich lle mewn cymhorthfa 

Dogfennau cefnogol

Cynllun Ymchwilydd sy'n Symud Yn Ymlaen 2025 - Trosolwg o'r cynllun a chanllawiau cais

Cynllun Ymchwilydd sy'n Symud Yn Ymlaen 2025 - Enghraifft o ffurflen gais

Cysylltu â ni

Os oes gennych gwestiynau ynglŷn â’r broses ymgeisio, cyfeiriwch at y dogfennau canllawiau’r alwad sydd wedi’u darparu. Gallwch hefyd gysylltu â’r tîm trwy e-bost.  

Hysbysiad preifatrwydd  

Mae hysbysiad preifatrwydd grantiau Llywodraeth Cymru yn nodi sut y bydd Llywodraeth Cymru yn defnyddio’r wybodaeth a ddarperir yn y cam ymgeisio.   

Mae'n bleser gennym gyhoeddi y bydd Cyfadran Ymchwil Iechyd a Gofal Cymru, o 17 Hydref 2024, yn trosglwyddo i ddefnyddio System Rheoli Dyfarniadau newydd a'r ymgeiswyr ar gyfer y Cymrodoriaethau Uwch a Doethurol nesaf fydd y grŵp cyntaf i ddefnyddio'r system newydd hon.

O fis Hydref 2024 ymlaen, bydd y Gyfadran yn gweinyddu'r holl alwadau newydd gan ddefnyddio'r System Rheoli Dyfarniadau a bydd yn dechrau symud rheolaeth holl ddyfarniadau personol presennol Ymchwil Iechyd a Gofal Cymru i'r system hon o fis Ionawr 2025.

Rydym yn rhagweld y bydd y System Rheoli Dyfarniadau newydd yn hwyluso prosesau mwy effeithlon ar gyfer y Gyfadran a fydd o fudd i'n hymgeiswyr a'n haelodau ac yn ein helpu i wella'r gefnogaeth i ymchwilwyr iechyd a gofal cymdeithasol yng Nghymru.

Os oes gennych unrhyw gwestiynau am y system newydd, cysylltwch â thîm y Gyfadran a fydd yn hapus iawn i helpu.