Cynllun Ariannu Integredig - Cangen 2: Ymchwil Gwasanaethau Iechyd a Gofal Cymdeithasol ac Iechyd y Cyhoedd

Bydd y gangen hon yn ariannu ymchwil sy’n canolbwyntio ar drefnu a darparu gwasanaethau iechyd a/neu ofal cymdeithasol neu faterion iechyd y cyhoedd, gan gynnwys atal ac iechyd y boblogaeth, sy’n bwysig yng Nghymru.

Sylwch fod y cynllun ariannu yn cael ei asesu drwy broses ymgeisio dau gam.

Cynllun Ariannu Integredig – Llinell Amser Galwad 3

Lansiad Cam 1: Dydd Mawrth 3 Medi 2024

Cam 1 yn cau: Dydd Iau 24 Hydref 2025

Lansiad Cam 2: Dydd Mercher 18 Rhagfyr 2024

Cam 2 yn cau: Dydd Mercher 5 Mawrth 2025 am 13:00

Argymhellion y bwrdd ariannu: Medi 2025

Dechrau’r prosiectau a ariennir: 1 Hydref 2025

Cyflwynir ceisiadau Cam 2 drwy wahoddiad yn unig.

Bydd gan yr alwad dan arweiniad ymchwilydd un pwynt ymgeisio y flwyddyn, a fydd yn lansio ym mis Medi. Bydd gan gangen ar gyfer galwadau ymchwil â ffocws, fel rhan o’r Cynllun Ariannu Integredig, un pwynt ymgeisio y flwyddyn, a fydd yn lansio yn y gwanwyn.

Cylch gwaith y Cynllun Ariannu Integredig a chymhwystra ar ei gyfer - Cangen 2: Ymchwil Gwasanaethau Iechyd a Gofal Cymdeithasol ac Iechyd y Cyhoedd

Pwrpas a chylch gwaith

Bydd y gangen Ymchwil Iechyd a Gofal Cymdeithasol ac Iechyd y Cyhoedd yn ariannu ymchwil sy’n canolbwyntio ar drefnu a darparu gwasanaethau iechyd a/neu ofal cymdeithasol neu faterion iechyd y cyhoedd, gan gynnwys atal ac iechyd y boblogaeth, sy’n bwysig yng Nghymru.

Gallai prosiectau, er enghraifft:

astudio’r ffordd y caiff gwasanaethau’r GIG a/neu ofal cymdeithasol eu darparu a’u defnyddio
archwilio’r ffordd y caiff adnoddau eu defnyddio neu ffyrdd eraill o ddarparu gwasanaethau iechyd neu ofal cymdeithasol
mynd i’r afael â materion sy’n ymwneud ag ansawdd a diogelwch gwasanaethau
gwerthuso datblygiadau arloesol o ran trefnu a darparu gwasanaethau
cyflawni synthesis a meta-ddadansoddiad o dystiolaeth mewn meysydd pwnc perthnasol
gwerthuso modelau iechyd a gofal cymdeithasol integredig
archwilio materion sy’n ymwneud ag ymddygiadau iechyd
archwilio materion sy’n ymwneud ag iechyd y cyhoedd
archwilio materion sy’n ymwneud ag annhegwch ac anghydraddoldeb ym maes iechyd a gofal.

Sylwch, fodd bynnag, na fydd y gangen hon yn ariannu:

ymchwil labordy neu ymchwil gwyddoniaeth sylfaenol, gan gynnwys ymchwil sy’n defnyddio anifeiliaid
ceisiadau sy’n gweddu’n well i’r gangen ymchwil trosi a chlinigol
sefydlu neu gynnal unedau ymchwil
ceisiadau sy’n ymwneud â datblygu gwasanaethau yn unig
ceisiadau sydd wedi’u cyfyngu i archwilio, arolygu neu asesu anghenion.

Er mwyn osgoi amheuaeth, er y bydd y cynllun yn ariannu ymchwil sydd wedi’i hanelu at werthuso effeithiolrwydd ymyriad gwasanaeth, ni fydd yn ariannu’r gost o ddarparu’r gwasanaeth na’r ymyriad ei hun.

Cyfeiriwch at ganllawiau ymchwil gofal cymdeithasol Ymchwil Iechyd a Gofal Cymru ar gyfer diffiniad o ymchwil gofal cymdeithasol.

Rhaid i bob ymgeisydd ddangos yr angen am yr ymchwil arfaethedig a pha mor bwysig ydyw, a disgrifio’n glir yr effaith y mae ei ganfyddiadau yn debygol o’i chael yn y tymor byr i’r tymor canolig a’r manteision sy’n debygol i’r cyhoedd, polisi neu ymarfer.

Lle bo’n berthnasol, bydd disgwyl i ymgeiswyr ddarparu manylion ar yr effaith y gallai ymyriadau effeithiol a chanfyddiadau’r ymchwil ei chael ac i ba raddau y gellir eu hehangu.

O ran ymchwil gofal cymdeithasol yn benodol, croesewir ceisiadau gan Ymgeiswyr Arweiniol â chymwysterau addas nad ydynt wedi ymgymryd ag ymchwil ym maes gofal cymdeithasol yn flaenorol.

Cylch gwaith cyffredinol y Cynllun Ariannu Integredig

Yn ogystal â’r ystyriaethau cylch gwaith sy’n benodol i bob cangen uchod, mae rhai pwyntiau ychwanegol isod sy’n berthnasol i’r ddwy gangen.

Croesewir ceisiadau sydd wedi’u cwmpasu’n dda a fydd yn cynhyrchu canfyddiadau i lywio ceisiadau ariannu ymchwil diweddarach, yn ogystal â cheisiadau ar gyfer prosiectau a fydd yn cynhyrchu canfyddiadau ‘sy’n cael effaith’ yn eu rhinwedd eu hunain.

Fodd bynnag, dylid nodi, er bod ceisiadau i ymgymryd ag ymchwil a fydd yn llywio ceisiadau dilynol i arianwyr eraill ar gyfer astudiaethau mwy o faint a/neu ddiffiniol yn cael eu hannog, ni fyddwn yn ariannu ceisiadau sydd eisoes yn addas i’w cyflwyno i raglenni’r Sefydliad Cenedlaethol dros Ymchwil Iechyd a Gofal (NIHR) y mae Ymchwil Iechyd a Gofal Cymru yn cyfrannu atynt. 

Croesewir ceisiadau gan ymchwilwyr ar ddechrau eu gyrfa a’r rhai nad ydynt wedi arwain ymchwil o’r blaen ond sy’n edrych i adeiladu portffolios ymchwil a chael profiad o arwain ymchwil.

O fewn paramedrau cyffredinol yr alwad, croesewir ceisiadau o wahanol hyd, maint a chost. Dylai ymgeiswyr gofio bod ceisiadau yn aml yn methu ar y cam asesu am eu bod yn cael eu hystyried yn rhy uchelgeisiol.

Bydd angen i ymgeiswyr ddangos eu bod wedi ystyried perthnasedd ac effaith eu gwaith ar grwpiau sydd â nodweddion gwarchodedig. Dylai’r rhai sy’n datblygu treialon fod yn ymwybodol o Fframwaith Ethnigrwydd INCLUDE – Trial Forge, a’i ystyried, er mwyn helpu i wella’r ffordd y caiff treialon eu cynnal ar gyfer grwpiau a danwasanaethir.

Caiff ymgysylltu â rhanddeiliaid perthnasol, ac yn enwedig sefydliadau sy’n darparu gwasanaethau, ei annog yn gryf drwy gydol y broses ymchwil er mwyn sicrhau’r potensial mwyaf o ran cyfnewid gwybodaeth ac effaith.

Dylai ymgeiswyr ddangos sut y bydd partneriaid ymchwil cyhoeddus yn cymryd rhan yn ystod y prosiect. Mae Ymchwil Iechyd a Gofal Cymru yn disgwyl cyfranogiad priodol sydd wedi’i ddylunio’n dda gan bartneriaid ymchwil cyhoeddus yn yr ymchwil y mae’n ei gefnogi, felly cyfeiriwch at Safonau’r DU ar gyfer Cynnwys y Cyhoedd mewn Ymchwil. Mae’n hanfodol dangos ar y ffurflen gais gynlluniau ar gyfer cynnwys partneriaid ymchwil cyhoeddus ar bob cam priodol o gylch bywyd y prosiect ymchwil.

Bydd yn ofynnol i bob ymgeisydd lunio cynllun lledaenu sy’n dangos yn glir sut y bydd negeseuon allweddol yr ymchwil yn cael eu cyfleu’n effeithiol i gynulleidfaoedd perthnasol, gan gynnwys llunwyr polisi, darparwyr gwasanaethau, defnyddwyr gwasanaethau, gofalwyr ac ymchwilwyr.

Cymhwystra ar gyfer y cynllun

Rhaid i ymgeiswyr arweiniol a chydarweiniol fod wedi’u lleoli mewn sefydliad yng Nghymru ar adeg gwneud cais (neu fod yn derbyn cynnig swydd sy’n golygu y byddant wedi’u lleoli yn y sefydliad cynnal cyn i’r prosiect ddechrau).
Rhaid i ymgeiswyr arweiniol a chydarweiniol feddu ar PhD, MD y DU neu ddoethuriaeth broffesiynol arall yn seiliedig ar ymchwil sy’n gysylltiedig ag iechyd neu ofal (derbynnir ceisiadau gan y rhai sydd wedi cyflwyno eu traethawd ymchwil PhD, neu gyfwerth, i’w sefydliad asesu yn ddiweddar, cyn belled â bod y ddoethuriaeth yn cael ei dyfarnu cyn i’r grant ddechrau) NEU fod â hanes cyfatebol o ymchwil ar adeg gwneud cais.
Rhaid i geisiadau gael eu cefnogi gan y sefydliad cynnal.
Croesewir ceisiadau gan ymchwilwyr sydd ar ddechrau eu gyrfa (a ddiffinnir yma fel unigolion nad oes ganddynt fwy na 60 mis o brofiad ymchwil ôl-ddoethurol, heb gynnwys, er enghraifft, seibiannau gyrfa, absenoldeb mamolaeth/tadolaeth a salwch), a’r rhai sydd eisiau bod yn ymchwilwyr arweiniol am y tro cyntaf.
Rhaid i geisiadau gan ymchwilwyr sydd ar ddechrau eu gyrfa gael cefnogaeth Prif Gyd-ymgeisydd gan uwch-ymchwilydd. Fel arall, ni fydd eich cais yn symud ymlaen. (Gall ymchwilwyr ar ddechrau eu gyrfa y mae eu ceisiadau yn llwyddiannus elwa ymhellach o aelodaeth Cyfadran Ymchwil Iechyd a Gofal Cymru.)
Os yw’r ymgeisydd arweiniol yn ymchwilydd ar ddechrau ei yrfa, rydym yn disgwyl i’r Prif Gyd-ymgeisydd ddod o’r un sefydliad oni bai bod sail resymegol gref, sy’n gysylltiedig ag arbenigedd academaidd a datblygiad yr ymchwilydd ar ddechrau ei yrfa, pam nad yw hyn yn wir.
Anogir ceisiadau ar gyfer prosiectau o wahanol hyd a gwahanol gost, ar yr amod bod achos cryf yn cael ei wneud dros werth ac ansawdd y gwaith. Y cyfnod mwyaf y gellir gwneud cais am arian ar ei gyfer yw 24 mis.

Yr arian sydd ar gael

Mae cronfa ariannu o tua £1.95m ar gael ar gyfer yr alwad a arweinir gan ymchwil (cyfanswm o £2.7m yn flynyddol, gan gynnwys £750k ar gyfer yr alwad â ffocws). Mae Ymchwil Iechyd a Gofal Cymru yn disgwyl ariannu tua phedwar i wyth prosiect ar draws y ddwy gangen ym mhob galwad.
O fewn y gronfa ariannu gyffredinol, nid oes cyfyngiad ar feintiau uchaf nac isaf y dyfarniadau, er y dylai ymgeiswyr fod yn ymwybodol o gyfanswm yr arian sydd ar gael a disgwyliadau Ymchwil Iechyd a Gofal Cymru ynghylch nifer y prosiectau y mae’n debygol o’u hariannu.

Meini prawf asesu Cam 1

Bydd angen i bob ymgeisydd gyflwyno achos cryf dros yr angen am ei gynnig ymchwil a’i bwysigrwydd yng Ngham 1, mewn perthynas â pholisi, ymarfer ac angen cyhoeddus.

Bydd hyn yn cynnwys:

disgrifiad clir o’r angen iechyd neu ofal y mae’n mynd i’r afael ag ef
gosod yr ymchwil arfaethedig yn y cyd-destun polisi neu ymarfer priodol
cyfiawnhad dros bwysigrwydd yr angen hwnnw, o ran maint y broblem a/neu’r effaith debygol ar y rhai sydd ag angen iechyd neu ofal
dangos bwlch yn y dystiolaeth ymchwil
dangos bod y dulliau a gynigir yn addas ar gyfer ateb y cwestiwn ymchwil.

Sylwch fod cyfranogiad cryf gan y cyhoedd wrth ddatblygu’r cais ymchwil a chyflawni’r prosiect yn cael ei ystyried yn un o’r rhagofynion o ran ariannu.

Meini prawf asesu Cam 2

Bydd angen i ymgeiswyr a wahoddir i gyflwyno cais Cam 2 nodi eu cynllun ymchwil a’u methodoleg yn fanwl. Bydd y cais yn cael ei asesu ar sail ei ansawdd gwyddonol, a bydd y Bwrdd Ariannu yn ystyried: 

A yw’r fethodoleg a’r wyddoniaeth yn gadarn
A yw’n dangos yn glir bod y cymysgedd sgiliau, profiad, rheoli prosiectau a’r seilwaith angenrheidiol ar waith i gwblhau’r prosiect yn llwyddiannus
A yw’r cyfraddau recriwtio amcangyfrifedig yn cael eu hesbonio’n dda a’u cyfiawnhau
A yw goblygiadau moesegol, cyfreithiol a chymdeithasol yr ymchwil arfaethedig wedi cael eu hystyried
A oes tystiolaeth o gyfranogiad y cyhoedd/ymarferydd wrth ddylunio a chyflwyno’r prosiect
A yw costau’r ymchwil yn cynrychioli gwerth da am arian.

Sylwch fod y meini prawf uchod yn ganllaw ar gyfer asesu, ac ni fydd y drafodaeth wedi’i chyfyngu i’r meysydd hyn. 

Proses asesu

Mae dwy gangen y Cynllun Ariannu Integredig yn defnyddio proses ymgeisio dau gam.

Bydd pob cais (amlinellol) Cam 1 yn destun gwiriadau cymhwystra a chystadleurwydd* sylfaenol i sicrhau bod ceisiadau o fewn cylch gwaith yr alwad a’r cynllun a’u bod yn addas i symud ymlaen i gael eu hasesu.
Bydd ceisiadau Cam 1 yn cael eu hasesu gan banel yn cynnwys aseswyr cyhoeddus, polisi, ymarfer ac academaidd a fydd yn adolygu ceisiadau o ran angen a phwysigrwydd (yn erbyn y meini prawf a nodir yn yr adran ‘Meini prawf asesu Cam 1’ uchod).
Bydd panel Cam 1 yn cynghori Ymchwil Iechyd a Gofal Cymru ar ba geisiadau a ddylai symud ymlaen i Gam 2. Dim ond ymgeiswyr y caiff eu cais Cam 1 ei flaenoriaethu ar sail pwysigrwydd y cwestiwn a chyda methodoleg digon cadarn a wahoddir i gyflwyno cais (llawn) Cam 2.
Caiff cynigion Cam 2 eu gwirio ar gyfer cylch gwaith a chystadleurwydd* a bydd y rhai y tybir eu bod yn gystadleuol yn destun adolygiad gwyddonol (a chyhoeddus) ac asesiad annibynnol gan y Bwrdd Ariannu. Mae’r Bwrdd Ariannu yn gwneud argymhellion ariannu i Ymchwil Iechyd a Gofal Cymru ar sail ansawdd gwyddonol/ academaidd y cais (yn erbyn y meini prawf a nodir yn yr adran ‘Meini prawf asesu Cam 2’ uchod).

*Sylwch: Ystyr ‘Ddim yn gystadleuol’ yw nad yw cais o safon digon da neu nad yw wedi’i gwblhau’n ddigon da i fynd ymlaen i gael ei asesu ymhellach.

Mae rhagor o wybodaeth am sut i gwblhau’r ffurflen gais ar gael yn nogfennaeth y cynllun.

Mae fersiwn Word o’r ffurflen gais ar gyfer cyfeirio ati’n unig. Bwriedir iddi fod yn ganllaw yn unig i helpu i gwblhau’r ffurflen gais ar-lein. Ni chaiff fersiynau Word o ffurflenni cais wedi’u cwblhau eu derbyn.