Ysgrifennydd y Cabinet dros Iechyd a Gofal Cymdeithasol yn croesawu hwb buddsoddiad cyhoeddus-preifat gwerth £100 miliwn i ddatgloi triniaethau blaengar

Mae Jeremy Miles, Ysgrifennydd Cabinet Llywodraeth Cymru dros Iechyd a Gofal Cymdeithasol, wedi croesawu'r newyddion y bydd cleifion yng Nghymru yn cael mwy o fynediad at driniaethau blaengar diolch i hwb ariannol cyhoeddus-preifat gwerth £100 miliwn. 

Bydd y cyllid, sydd ar gael drwy Raglen Fuddsoddi Cynllun Gwirfoddoli ar gyfer Prisio, Mynediad a Thwf Meddygaeth Brand (sef VPAG) ehangach gwerth £400 miliwn, yn gweld 20 o Ganolfannau Cyflenwi Ymchwil Masnachol (neu CRDCau) yn cael eu sefydlu ledled y DU, gan weithredu fel canolfannau rhanbarthol ar gyfer treialon clinigol arloesol a chreu cyfleoedd i brofi triniaethau newydd arloesol gyda’r offer a’r dechnoleg ddiweddaraf.

Bydd treialon clinigol yn adeiladu arweinyddiaeth cyflenwi ymchwil y DU ym mhob cyflwr ar draws canolfannau aml-arbenigol.  Mae hyn yn cynnwys canser a gordewdra, yn ogystal â chlefydau heintus fel y ffliw a firws syncytaidd anadlol (FSA). Bydd y CRDCau yn cefnogi sefydlu astudiaethau masnachol yn gyflym fel y gall cleifion ddechrau cael triniaethau sy'n cael treialon cyn gynted â phosibl.

I gefnogi'r Cynllun Iechyd 10 Mlynedd, bydd CRDCau yn symud treialon clinigol i leoliadau cymunedol, sy'n golygu y bydd y rhai mewn rhanbarthau sydd heb eu gwasanaethu'n ddigonol yn gallu cymryd rhan mewn ymchwil yn well. Bydd hyn yn rhoi hwb i fynediad at driniaethau newydd yn y cam treialu. 

Dywedodd Ysgrifennydd Cabinet Llywodraeth Cymru dros Iechyd a Gofal Cymdeithasol, Jeremy Miles:

"Bydd buddsoddi mewn Canolfan Cyflenwi Ymchwil Fasnachol Cymru'n Un (CRDC Cymru) yn helpu i gryfhau ein dull o dreialon clinigol a chynyddu'r cyfleoedd i bobl gael mynediad at driniaethau newydd ac arloesol.  Gall astudiaethau ymchwil ddarparu manteision gwirioneddol i ofal cleifion, ac rydym wedi ymrwymo i weithio mewn partneriaeth ledled y DU i hybu ymchwil fasnachol fyd-eang."

Dywedodd y Farwnes Gillian Merron, y Gweinidog Iechyd:

"Mae'r buddsoddiad preifat sylweddol hwn mewn ymchwil iechyd yn bleidlais bwerus o hyder yn sector ymchwil a gwyddorau bywyd mwyaf blaenllaw'r DU.

"Bydd y canolfannau newydd yn helpu i symud ymchwil i gymunedau llai, gan ganiatáu i fwy o bobl gael mynediad at driniaethau blaengar yn gyflymach.

"Mae atal yn well na gwella - bydd y treialon hyn yn helpu i ddatgloi'r genhedlaeth nesaf o driniaethau, yn hybu twf economaidd ac yn adeiladu GIG sy'n addas ar gyfer y dyfodol."

Mae'r cyllid yn rhan o gynllun buddsoddi cyhoeddus-preifat ehangach gwerth £400 miliwn - Rhaglen Fuddsoddi Cynllun Gwirfoddol ar gyfer Prisio, Mynediad a Thwf Meddygaeth Brand.  Mae'n bartneriaeth unigryw rhwng y llywodraeth a'r diwydiant fferyllol i hybu cystadleurwydd byd-eang sector gwyddorau bywyd y DU ac ysgogi twf economaidd.

Mae cysylltiad annatod rhwng iechyd cenedl ac iechyd yr economi; bydd y CRDCau newydd yn cryfhau'r DU fel pwerdy ar gyfer gwyddorau bywyd a thechnoleg feddygol, gan ysgogi twf economaidd.

Mae'r hwb i fuddsoddi yn dilyn y Cynllun ar gyfer Newid a gyflwynwyd gan y Prif Weinidog yr wythnos diwethaf, sy'n nodi cerrig milltir uchelgeisiol ond cyraeddadwy ar gyfer y Genhadaeth a fydd yn ysgogi gwelliannau gwirioneddol ym mywydau gweithwyr.

Fel rhan o'r Cynllun Iechyd 10 Mlynedd, bydd y llywodraeth yn symud gofal o driniaeth i atal a bydd y buddsoddiad hwn yn cefnogi ymchwil i frechlynnau a meddyginiaethau ataliol, gan helpu pobl i fyw bywydau iachach am fwy o amser yn y pen draw.

Mae deddfwriaeth wedi'i gosod heddiw a fydd yn trawsnewid treialon clinigol yn y DU trwy gyflymu cymeradwyaethau'r treial gan hefyd warchod diogelwch cleifion.  Dyma'r ailwampiad mwyaf o reoliadau mewn 20 mlynedd a bydd yn cael gwared ar brosesau biwrocrataidd a symleiddio i gael treialon clinigol ar waith cyn gynted â phosibl. Mae'r newidiadau'n cael eu cyflwyno gan yr Asiantaeth Rheoleiddio Meddyginiaethau a Chynhyrchion Gofal Iechyd a'r Awdurdod Ymchwil Iechyd (AYI).

Dywedodd y Gweinidog Gwyddoniaeth yr Arglwydd Vallance:

"Os ydym am droi'r datblygiadau diweddaraf mewn gwyddoniaeth feddygol yn driniaethau arloesol a therapiwteg i gleifion, mae'n hanfodol bod busnesau blaenllaw a buddsoddiad preifat yn gweithio mewn partneriaeth â'r GIG.  Mae hyn yn arbennig o bwysig ar gyfer treialon clinigol lle mae gan y DU hanes cryf a gall ddod yn arweinydd eto."

Dywedodd Richard Torbett, Prif Weithredwr Cymdeithas Diwydiant Fferyllol Prydain:

"Mae'r chwistrelliad o arian gan ddiwydiant i'r rhaglen hon yn enghraifft wych o ddiwydiant a'r llywodraeth yn gweithio mewn partneriaeth i wella iechyd ac ysgogi twf. Rydym yn gwybod bod treialon clinigol y diwydiant yn dod â manteision enfawr i economi'r DU, yn cynhyrchu refeniw i'r GIG ac yn arwain at well canlyniadau cleifion mewn ysbytai sy'n weithgar mewn ymchwil.

"Mae'r CRDCau wedi'u hanelu at gefnogi treialon clinigol y diwydiant ar draws llawer o leoliadau gofal gwahanol ym mhedair gwlad y DU.  Rydym yn edrych ymlaen at weld y rhwydwaith o CRDCau newydd yn gweithio'n agos gyda diwydiant i gynnig cyfle i fwy o gleifion ledled y DU gymryd rhan mewn astudiaethau o'r triniaethau diweddaraf sydd ar flaen y gad."

Mae VPAG yn gytundeb gwirfoddol rhwng yr Adran Iechyd a Gofal Cymdeithasol, GIG Lloegr a Chymdeithas Diwydiant Fferyllol Prydain, a ddyluniwyd i wella canlyniadau cleifion, rheoli bil meddyginiaethau'r GIG, a chefnogi'r diwydiant gwyddorau bywyd. Wedi'i lansio fel rhan o'r cynllun, bydd buddsoddiad ychwanegol gan gwmnïau fferyllol yn cefnogi gweithredu'r rhaglen fuddsoddi.

Cofrestrwch i'r bwletin wythnosol am y newyddion diweddaraf am dreialon clinigol yng Nghymru.