Dr Thomas Massey

Mae Dr Thomas Massey yn gymrawd clinigol academaidd ym maes Niwroleg yn yr Ysgol Feddygaeth.

Mae ei ddiddordeb ymchwil yn ymwneud â phathogenesis moleciwlaidd clefyd Huntington ac anhwylderau ehangu ailadroddol eraill. Mae niwroddirywiad cynyddol yn nodwedd o fwyafrif y cyflyrau hyn, ac nid oes yna driniaeth sy’n addasu’r clefyd ar gyfer unrhyw un ohonyn nhw ar hyn o bryd.

Nod cyffredinol y rhaglen ymchwil hon yw manteisio ar fewnwelediadau o geneteg ddynol, modelau celloedd a biocemeg i nodi targedau therapiwtig newydd sy’n gallu torri ar draws nifer o anhwylderau ehangu ailadroddol.

Fel Niwrolegydd, mae Thomas yn gweld cleifion yn y clinig a bu a wnelo’n helaeth â threialon clinigol ym maes clefyd Huntington. Mae’n gobeithio y byddwn ni, trwy ddeall manylion moleciwlaidd anhwylderau ehangu ailadroddol, yn gallu datblygu triniaethau newydd sydd â’r potensial i arafu neu atal y clefydau hyn nad oes gwella ohonyn nhw.

Mae Gwarantwyr yr Ymennydd, Academi’r Gwyddorau Meddygol, y Cyngor Ymchwil Feddygol (Cymrodoriaeth hyfforddiant ymchwil ôl-ddoethurol), Cymdeithas Niwrolegwyr Prydain (Cymrodoriaeth Ymddiriedolaeth Elusennol Patrick Berthoud), Ymddiriedolaeth Ymchwil yr Ymennydd a Rhwydwaith Clefyd Huntington Ewrop yn cefnogi ei waith.

Yn y newyddion:  

Astudiaethau Clefyd Niwronau Motor yng Nghymru yn gobeithio gwneud gwahaniaeth (Mehefin 2022)

Mae Ymchwil Iechyd a Gofal Cymru yn buddsoddi mewn arweinwyr ledled Cymru i lywio ymchwil y dyfodol (Ebrill 2022)