Rhyddhau hyfforddiant Cyflwyniad i Arfer Clinigol Da ar ffurf newydd

Mae ffurf newydd ar gyfer hyfforddiant Cyflwyniad i Arfer Clinigol Da (GPC) yn cael ei ryddhau ledled y DU. Bydd yr hyfforddiant Cyflwyniad i GPC nawr yn cynnwys:

Rhan A, E-ddysgu gorfodol, trwy NIHR Learn, sy’n agored i bob ymchwilydd ledled y DU
Rhan B, Sesiwn Cydgrynhoi GPC dewisol – wedi’i chyflwyno’n lleol, ar draws y DU, mewn sesiynau wyneb yn wyneb neu rithwir gyda hwyluswyr GPC profiadol yn eich rhwydwaith

Oherwydd y pandemig bu’n rhaid dod â’r holl hyfforddiant GPC wyneb yn wyneb ledled y DU i ben a chafodd ymchwilwyr eu cyfeirio at y cwrs e-ddysgu fel yr unig ddewis a oedd ar gael. Yng Nghymru, gwnaethom greu cwrs Hanfodion GPC byr, rhithiol i ategu’r e-ddysgu, a gwnaeth llawer o’r Rhwydweithiau Ymchwil Clinigol Lleol yn Lloegr ddilyn yr un drefn.

Casglodd y Sefydliad Cenedlaethol dros Ymchwil Iechyd (NIHR) adborth gan gyfranogwyr y cwrs a gwnaethant ddarganfod, er bod pobl o’r farn bod yr e-ddysgu’n drylwyr ac yn hawdd mynd ato, bod llawer o ymchwilwyr yn teimlo eu bod yn colli cyfle o ran dyfnder y ddealltwriaeth a’r natur ymarferol y mae sesiynau wyneb yn wyneb yn eu cynnig. Gwnaeth pobl sylwadau hefyd ar fanteision gallu cael mynediad at hyfforddiant ar wahanol ffurfiau, yn enwedig lle y gall teithio neu amser fod yn broblem o ran cael y cyfle i fanteisio ar hyfforddiant.

Yn dilyn adolygiad, penderfynwyd y byddai model newydd ar gyfer hyfforddiant GPC yn cael ei gyflwyno ledled y DU - gan arwain at sesiwn Cydgrynhoi GPC. Bydd ymchwilwyr yn cwblhau’r rhan A e-ddysgu GPC i ennill eu ‘Tystysgrif GPC’ cydnabyddedig yna yn cael y dewis i fynychu sesiwn rhan B Cydgrynhoi GPC, naill ai’n rhithiol neu drwy sesiwn leol wyneb yn wyneb. Mae’r sesiwn Cydgrynhoi GCP yn cynnwys gweithgareddau ymarferol sy’n defnyddio enghreifftiau astudio’r byd go iawn i ddod â’r dysgu’n fyw a rhoi dealltwriaeth ddyfnach.

Bydd cynrychiolwyr yn derbyn tystysgrif ychwanegol am fynychu sesiwn Cydgrynhoi GCP, ond bydd tystysgrif e-ddysgu GPC yn ddigonol ar gyfer ffeil y lleoliad.

Mae rheolwyr hyfforddiant o Ymchwil Iechyd a Gofal Cymru wedi cymryd rhan weithredol yng ngweithgor Cydgrynhoi GCP, gan gyfrannu at y gweithgareddau newydd ac adolygu cynnwys. Rydym yn llawn cyffro i allu cyflwyno’r deunydd newydd hwn i ymchwilwyr yng Nghymru, ac yn hapus i ailgyflwyno hyfforddiant wyneb yn wyneb yn araf deg unwaith eto.

Nid yw newidiadau i Gwrs Gloywi GPC wedi’u penderfynu eto. Mae hwn ar gael ar ffurf e-ddysgu yn unig ar hyn o bryd ond mae cynlluniau ar y gweill ar gyfer ei ddatblygu.

Rhannodd y cynrychiolwyr adborth am fynychu ein sesiynau hyfforddi:

Fe wnes i fwynhau’r hyfforddiant hwn yn fawr a byddwn i’n ei argymell i unrhyw un arall sy’n mynd i gymryd rhan mewn ymchwil" – Mynychwr yr hyfforddiant

Cwrs difyr iawn gyda hyfforddwyr gwych a wnaeth i mi deimlo wedi fy nghynnwys ac wedi fy annog i gymryd rhan" – Mynychwr yr hyfforddiant

Mae’n wych cael hwyluswyr gydag amrywiaeth o brofiad ymchwil o le y gallan nhw ddod â phrofiadau gwirioneddol sy’n berthnasol i’r hyfforddiant" – Mynychwr yr hyfforddiant

Cwestiynau Cyffredin sesiwn Cydgrynhoi GPC

Beth sydd wedi newid o’r hen ddeunydd GPC wyneb yn wyneb?

Mae’r enghreifftiau wedi eu hadnewyddu a’u diwygio, mae pwyslais ar y cyd ar dreialon clinigol o gynnyrch meddyginiaethol ymchwiliol (CTIMP) (astudiaethau cyffuriau) a rhai nad ydynt yn dreialon clinigol o gynnyrch meddyginiaethol ymchwiliol, yn ogystal ag ymchwil glinigol ac ymchwil gofal a chymunedol ehangach. Nid yw’r e-ddysgu GPC wedi ei newid.

A oes angen i ni fynychu’r Sesiwn Cydgrynhoi GPC?

Na, dim ond e-ddysgu GPC sy’n orfodol i’r rhai sydd angen tystysgrif GPC ddilys ar gyfer eu gwaith. Mae’r cwrs Cydgrynhoi GPC yn gwrs dewisol y gallwch chi ddewis ei gwblhau i gael dealltwriaeth ddyfnach.

A ddylai dysgwyr fod wedi mynychu cwrs e-ddysgu GPC cyn mynd i’r gweithdy GPC?

Dylent, mae hyn yn ofyniad er mwyn cael lle yn y gweithdy hwn, gan ei fod yn ymwneud â rhoi’r wybodaeth y mae dysgwyr wedi’i chael o’r e-ddysgu ar waith.

A oes rhagofyniad o ran pryd mae dysgwr wedi cwblhau’r cwrs e-ddysgu a phryd y dylai gwblhau’r gweithdy hwn?

Rydym yn argymell y dylai e-ddysgu fod wedi’i gwblhau yn ystod y 6 mis diwethaf.

Beth am ardystiad ar gyfer y gweithdy hwn?

Bydd dysgwyr yn derbyn tystysgrif ychwanegol am fynychu sesiwn Cydgrynhoi GPC, fodd bynnag, bydd tystysgrif e-ddysgu GCP yn ddigon ar gyfer ffeil y lleoliad.

Pam nad yw Cydsyniad Deallus wedi’i gynnwys yn y cwrs Cydgrynhoi GCP?

Mae’r cwrs e-ddysgu GPC yn cynnwys llawer iawn ar y pwnc Cydsyniad Deallus. Teimlwyd hefyd fod y sesiynau hyfforddi cydsyniad dan arweiniad hwylusydd, sy’n cael eu cynnal gan rwydweithiau unigol ar draws y DU, gan gynnwys Ymchwil Iechyd a Gofal Cymru, yn darparu’r wybodaeth hon yn fanylach. Mae hyn hefyd yn cael ei ategu gan y modiwlau cydsynio deallus arbenigol ar NIHR Learn ar gyfer gwahanol gymunedau a grwpiau agored i niwed. Byddwn yn cyfeirio at hyn yn ystod y cwrs Cydgrynhoi GPC.