Cynnwys y cyhoedd yn eich ymchwil

Mae gan Ymchwil Iechyd a Gofal Cymru genhadaeth i gefnogi a datblygu ymchwil ragorol sy’n cael effaith bositif ar iechyd, llesiant a ffyniant pobl yng Nghymru. Rydyn ni o’r farn bod cynnwys y cyhoedd yn gwneud ymchwil yn fwy perthnasol, yn fwy dibynadwy ac yn fwy tebygol o newid arfer.

Gall aelodau’r cyhoedd eich helpu i ddewis pynciau ymchwil perthnasol a gwneud yn siŵr eich bod yn gofyn y cwestiynau iawn; eich helpu i benderfynu sut i gynnal astudiaeth, gan ddefnyddio’u profiad fel rhywun sy’n byw â salwch neu gyflwr; a gallan nhw hefyd eich helpu unwaith y mae’r astudiaeth wedi’i chwblhau trwy werthuso neu rannu canlyniadau’ch ymchwil.

Yn 2019-20, cytunodd ymchwilwyr, rheolwyr ymchwil ac aelodau’r cyhoedd ar y cyd ar y weledigaeth a’r camau ymarferol y dylid eu cymryd i lunio ein dull ar y cyd o fynd ati i gynnwys ac ymgysylltu â’r cyhoedd, a gellir darllen am hyn yn adroddiad ‘darganfod eich rôl’.

Sut i fanteisio ar gefnogaeth

Yn Ymchwil Iechyd a Gofal Cymru, mae ein tîm ymroddgar, Peter, Rebecca ac Emma, yma i’ch cynorthwyo i gynnwys y cyhoedd yn eich ymchwil. Maen nhw’n darparu cefnogaeth ac adnoddau gwerthfawr i hwyluso cynnwys y cyhoedd yn eich gwaith. Hyd yn oed cyn cael cyllid ar gyfer eich ymchwil, gallwch chi fanteisio ar y Gronfa Galluogi Cynnwys, sy’n cynorthwyo â chynnwys y cyhoedd yn ystod cyfnod datblygu’ch prosiect ymchwil.

I wneud y broses yn haws, rydyn ni wedi dylunio pecyn cymorth cynnwys y cyhoedd i ymchwilwyr, sy’n cynnwys yr holl wybodaeth angenrheidiol i gael y cyhoedd i ymgysylltu â’ch ymchwil.

Os oes gennych chi ddiddordeb mewn cynnwys cleifion, defnyddwyr gwasanaeth, gofalwyr neu’r cyhoedd yn eich ymchwil, llenwch y ffurflen cais am gefnogaeth cynnwys y cyhoedd neu cysylltwch â’n tîm. Rydyn ni yma i helpu.

Gwthio’r cwch i’r dŵr

I roi cychwyn ar gynnwys y cyhoedd mewn ymchwil, dilynwch y camau hyn:

• Lawrlwythwch Safonau’r DU ar gyfer Cynnwys y Cyhoedd mewn ymchwil.
• Dewch i ddeall tri chategori cynnwys y cyhoedd a dewis yr un sydd fwyaf addas i’ch ymchwil chi.

I gael hyfforddiant mewn cynnwys y cyhoedd, gallwch chi:

• Gyrchu ein cwrs hyfforddiant byr cyflwyniad i gynnwys y cyhoedd ar-lein, sydd ar gael ar gyfer ymchwilwyr ac aelodau’r gymuned cynnwys y cyhoedd.
• Archwiliwch wefan Dysgu er Cyfranogiad, sy'n cynnwys adnoddau a ddatblygwyd yng Nghymru ac ar eu cyfer.

Os oes gan eich sefydliad ddiddordeb mewn hyfforddiant wedi’i deilwra ar gynnwys y cyhoedd, gall tîm Cyfathrebu, Cynnwys ac Ymgysylltu Ymchwil Iechyd a Gofal Cymru helpu. Byddwn ni’n defnyddio’r cylch ymchwil i nodi meysydd a dulliau addas ar gyfer cynnwys y cyhoedd, wedi’i deilwra ar gyfer ffocws penodol eich sefydliad chi. I wneud cais am yr hyfforddiant hwn, anfonwch e-bost atom ni.

Penodi aelodau’r cyhoedd

Unwaith rydych chi wedi penodi aelodau’r cyhoedd i’w cynnwys yn eich ymchwil, bydd yr offerynnau a’r templedi a ganlyn yn ddefnyddiol:

• Rhestr wirio penodi i ymchwilwyr – rhestr wirio i gynorthwyo i fynd ymlaen i’r camau nesaf ar gyfer cynnwys y cyhoedd yn ystyrlon.
• Templed cod ymddygiad – gellir addasu a phoblogi’r templed hwn i ddiwallu anghenion eich sefydliad chi.
• Templed cylch gorchwyl – Nod y templed hwn yw’ch helpu i ddatblygu cylch gorchwyl ar gyfer grŵp, fel grwpiau cynghori cynnwys y cyhoedd neu baneli ymchwil.
• Gweithdrefn datrys problemau – nid cyflogaeth mo cynnwys y cyhoedd ac, fel rheol, mae’n brofiad positif i bawb sydd a wnelo ag ef. Weithiau mae pethau’n mynd o chwith a dylai’r weithdrefn hon helpu; mae wedi’i seilio ar gyngor oddi wrth Gyngor Gweithredu Gwirfoddol Cymru (CGGC).
• Talu am Gynnwys y Cyhoedd mewn Ymchwil Iechyd a Gofal: Mae’r canllaw hwn yn cynorthwyo sefydliadau i benderfynu ar y dull mwyaf addas o dalu wrth gynnwys y cyhoedd.
• Pecyn Cymorth Effaith Cynnwys y Cyhoedd – set o offerynnau pragmatig â’r nod o gefnogi ymchwilwyr sy’n gweithio gyda chyfranogion cyhoeddus i gynllunio, olrhain ac adrodd ar gynnwys y cyhoedd.  
• Gwasanaeth Cyngor ar Fudd-daliadau wrth gynnwys y cyhoedd – gwasanaeth sy’n gallu rhoi cyngor ar effaith derbyn tâl am amser ar aelodau’r cyhoedd sy’n derbyn budd-daliadau, ffôn 07535 690 987 neu 01234 346 543 neu e-bost benefitsadviceservice@bedfordcab.org.uk

I gael rhagor o gefnogaeth, gwybodaeth neu i siarad â Peter, Rebecca neu Emma am gynnwys y cyhoedd, anfonwch e-bost atom ni.